«Առևտրի և ծառայությունների մասին» օրենքում դեղերի պարտադիր դրոշմապիտակավորումը հարուցել է դեղ ներմուծողների և տեղական արտադրողների դժգոհությունը: Ինչպես այսօր «Բլից ինֆո» մամուլի ակումբում փաստեց դեղ արտադրողների եւ ներմուծողների միության նախագահ Սամվել Զաքարյանը, դրոշմապիտակավորումը կխթանի մաքսանենգ դեղերի ներմուծմանը, կպարալիզացնի ոլորտն ու պատճառ կդառնա դեղերի թանկացմանը:
«Աշխարհի ոչ մի երկրում այսպիսի համակարգ չի գործում: Այն մասնավոր հատվածի համար միայն մի շարք խնդիրների առաջացման պատճառ է դառնալու»,-ասաց Զաքարյանը՝ հավելելով, որ օրենսդրական փոփոխությունը կատարվել է առանց դեղարտադրող եւ ներմուծող միության հետ քննարկելու:
Ըստ բանախոսի՝ քանի որ տեխնիկապես հնարավոր չէ դրոշմապիտակավորումը ավտոմատացնել, նախատեսվում է այն անել բացառապես ձեռքով, ինչը կբերի դեղերի թանկացման:
Սամվել Զաքարյանը տեղեկացրեց , որ եթե մինչ օրս շատ դեղեր վաճառվում էին ոչ թե ամբողջական փաթեթով, այլ հատիկով, ապա, ըստ նոր օրենքի, դեղատներում այլևս հատով դեղեր չեն վաճառվի: «Եթե դեղատան աշխատողը տուփից առանձնացնի դեղն ու հատով վաճառի, ապա դա կդիտվի օրենքի խախտում և տվյալ անձը կենթարկվի օրենքով նախատեսված պատժամիջոցների»,-ասաց Զաքարյանը և ավելացրեց, որ իրենց համար այդպես էլ անհասկանալի է մնացել, թե ինչպիսի ուսումնասիրությունների արդյունքում է առողջապահության նախարարությունը որոշում ընդունել, որ հնարավոր է՝ դեղերը երկուսից-հինգ դրամ թանկանան: Ըստ բանախոսի՝ դեղերն ավելի կթանկանան:
Կարդացեք նաև
ԴԱՆ նախագահը տեղեկացրեց, որ կրկին դիմելու են նախագահին, կառավարությանը՝ հարցին արդյունավետ լուծում տալու համար:
Պերճուհի ԳԵՎՈՐԳՅԱՆ
