ՀՀ կրթության և գիտության նախարարությունը (ՀՀ ԿԳՆ) 2015 թ. Երևանում կայանալիք Եվրոպական բարձրագույն կրթական տարածքի նախարարական գագաթնաժողովի և Բոլոնիայի քաղաքականության 4-րդ ֆորումի կազմակերպչական աշխատանքների շրջանակում հայտարարել էր միջոցառման տարբերանշանի (լոգո) մրցույթ:
Մրցութային հանձնաժողովն արդեն ամփոփել է արդյունքները, և այսօր ՀՀ կրթության և գիտության նախարար Արմեն Աշոտյանը հաղթողներին հանձնեց իրենց մրցանակները:
«Շաբաթներ առաջ հայտարարված մրցույթին բազմաթիվ երիտասարդ դիզայներներ մասնակցեցին: Պայման էինք դրել, որ առաջարկվող տարբերանշանը պարունակի ինչպես Եվրոպայի բարձրագույն կրթական տարածքի խորհրդանիշներ, տարրեր, այնպես էլ արտացոլի Հայաստանը՝ որպես գագաթնաժողովը հյուրընկալող երկիր»,- ասաց ԿԳ նախարարը:
Տարբերանշանի մրցույթում հաղթող են ճանաչվել Լուիզա Պետրոսյանը (1-ին տեղ), Արման Հակոբյանը (2-րդ տեղ) և Նորա Սմբատյանը (3-րդ տեղ):
«Հայաստանն իմ ստեղծած լոգոյով է ներկայանալու Եվրոպային: Ինձ համար դա մեծ պատիվ է»,- նշեց առաջին մրցանակակիր Լուիզա Պետրոսյանը:
Կարդացեք նաև
Հաղթողների համար սահմանվել է մրցանակային ֆոնդ՝ 1-ին տեղ՝ 300 հազար դրամ, 2-րդ տեղ՝ 200 հազար դրամ, 3-րդ տեղ՝ 100 հազար դրամ:
Մրցութային հանձնաժողովի որոշմամբ և ՀՀ կրթության և գիտության նախարարի հրամանով նախարարության շնորհակալագրերով պարգևատրվեցին նաև մրցույթին մասնակից դիզայներներ Մարիետա Հարությունյանը, Մարիաննա Սարգսյանը և Գևորգ Բալյանը:
Նշենք, որ տարբերանշանի օգտագործման և տնօրինման իրավասությունը կպատկանի ՀՀ ԿԳՆ-ին:
Սիրանուշ ՀԱՅՐԱՊԵՏՅԱՆ
