Հատված սահմանադրական փոփոխությունները նախապատրաստող մասնագիտական հանձնաժողովի անդամ, ԵՊՀ իրավագիտության ֆակուլտետի դեկան ԳԱԳԻԿ ՂԱԶԻՆՅԱՆԻ հարցազրույցից:
-Հարցերի հարցը, որոնց շուրջ, անգամ բարեփոխումների անհրաժեշտությունը չընդունելով, բանավիճում են քաղաքական դաշտի հիմնական խաղացողները, եղել եւ մնում է կառավարման համակարգի փոփոխության խնդիրը։ Մասնագիտական հանձնաժողովում կոնսենսուս կա՞ այդ հարցի վերաբերյալ։
-Պատահական չէ, որ այդ հարցը սուր քննարկումների տեղիք է տվել, որովհետեւ դրանով են պայմանավորված նաեւ մյուս ինստիտուտների վերաբերյալ մոտեցումները։ Հանձնաժողովի անդամներն էլ միակարծիք չեն այս հարցում՝ քննարկումներ անշուշտ եղել են, բայց չի քվեարկվել՝ ով ինչի կողմնակից է, ինչ է ներկայացվելու վերջնական փաստաթղթում։
Կարծում եմ, երկու տարբերակն էլ պետք է ներկայացվեն իրենց դրական եւ բացասական կողմերով՝ ե՛ւ գործող համակարգի բարելավմանն ուղղված առաջարկները, ե՛ւ եթե ընդհանուր համաձայնություն լինի քաղաքական ուժերի միջեւ կամ մեծամասնությունը հակված լինի կառավարման ձեւի փոփոխությանը, ինչպիսի հետեւանքների դա կարող է հանգեցնել դրական զարգացումների առումով։ Այնպես որ, այս պահին երկուսն էլ հրապարակի վրա են, մնացածը արդեն՝ որ կառավարման մոդելին տալ նախապատվությունը, քաղաքական ուժերը պետք է որոշեն։
Կարդացեք նաև
-Անձամբ դուք, որպես իրավաբան, ո՞ր տարբերակն եք նախընտրելի համարում. դրական եւ բացասական զարգացումների հաշվեկշիռը, ըստ ձեզ, գործող համակարգի՞, թե՞ խորհրդարանական մոդելի օգտին է։
-Որպես հանձնաժողովի անդամ այս պահին կողմնակից եմ գործող համակարգի կատարելագործմանը։ Բայց, նորից եմ ասում, դրա վերջնական լուծումը թողնված է քաղաքական ուժերին, որովհետեւ դա նախ եւ առաջ քաղաքական խնդիր է։ Մասնագիտականն ավարտվել է այնտեղ, որտեղ ներկայացվել են կառավարման այս կամ այն մոդելի դրական եւ բացասական կողմերը պետության համար առանցքային խնդիրների լուծման արդյունավետության առումով։
Ընդհանրապես հակված չեմ ոչ էվոլյուցիոն զարգացումներին՝ այս համակարգը ջարդենք, մյուսը բերենք, տեսնենք՝ ինչ կստացվի, չնայած մեծամասնությունը նախապատվությունը տալիս է խորհրդարանական համակարգին. գոնե նախնական քննարկումների ժամանակ նման կարծիքներ են հայտնվել։
Լիլիթ ՊՈՂՈՍՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
