Սպառողական շուկայում այս տարվա ինն ամիսներից հինգ ամիսների ընթացքում արձանագրվել է գնանկում, որը կազմել է 4,6 տոկոս։ Բարձր գնաճ է արձանագրվել հունվար ամսին՝ 2,8 տոկոս, ապրիլին՝ 0,5 տոկոս եւ վերջին երկու ամիսների ընթացքում՝ օգոստոսին եղել է 0,7 տոկոս գնաճ, իսկ սեպտեմբերին՝ 0,4 տոկոս։ Այս տվյալներն այսօր «Հենարան» ակումբում ներկայացրեց Ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը։
Բանախոսը ներկայացրեց, որ այս տարվա սեպտեմբեր ամսին օգոստոս ամսվա համեմատ եղել է 0,4 տոկոս գնաճ։ Այդ թվում՝ պարենային ապրանքների գներն աճել են 0,7 տոկոսով, ոչ պարենային ապրանքներինը՝ 0,9 տոկոսով, իսկ ծառայությունների ոլորտում արձանագրվել է սակագների 0,1 տոկոսի նվազում. «Պարենային 13 ապրանքային խմբերից տասում արձանագրվել է 0,1 -ից մինչեւ 9,4 տոկոս գնաճ։ Ամենաբարձր գնաճը եղել է ձվի պարագայում՝ 9,4 տոկոս, նաեւ բարձր գնաճ է եղել բանջարեղեն ապրանքային խմբում՝ 5,9 տոկոս»։
Պրն Մարտիրոսյանը նաեւ տեղեկացրեց, որ երկու ապրանքային խմբում 4,4 տոկոսից մինչեւ 0,3 տոկոս գնանկում է եղել, իսկ ոգելից խմիչքների պարագայում անցյալ ամսվա համեմատ՝ գները մնացել են նույնը։
Բանախոսը անդրադարձավ Հայաստանի մարզերում գնաճին եւ նշեց, որ սեպտեմբեր ամսին յոթ քաղաքներում եղել է 0,1 տոկոսից մինչեւ 0,5 տոկոս գնաճ. «Ամենաբարձր գնաճը եղել է Երեւան եւ Գյումրի քաղաքներում՝ 0,5 տոկոս, ամենացածրը՝ Եղեգնաձորում ՝ 0,1 տոկոս»։
Կարդացեք նաև
Գուրգեն Մարտիրոսյանը նաեւ նշեց, որ այս տարի, ինչպես եւ նախորդ տարիներին, հոկտեմբեր ամսից կսկսի աճել բանջարեղենի գինը։
Էլյա ՀՈՎՀԱՆՆԻՍՅԱՆ
