Միքայել Մելքումյանը համարում է, որ պետք է մարդկանց հնարավորություն տալ հասկանալու համար՝ այդ պայմաններով իրենք կարո՞ղ են աշխատել
Հոկտեմբերի 1-ից շրջանառության մեջ է մտել «Շրջանառության հարկի մասին օրենքը», որն առաջացրել է բազմաթիվ առեւտրականների դժգոհությունը: ԲՀԿ խմբակցության անդամ Միքայել Մելքումյանն առաջարկել էր օրենքը կիրառել կամավորական սկզբունքով, այսինքն՝ ովքեր չեն ցանկանում աշխատել 1 տոկոս հարկային տիրույթում, կարող են շարունակել իրենց աշխատանքը 3.5 տոկոսի տիրույթում: Սակայն տնտեսագետներից ոմանք կարծիք էին հայտնել, թե այդ եղանակով անհավասար մրցակցային եւ հարկային դաշտ է ստեղծվում, իսկ ստվերն էլ չի կրճատվում:
Aravot.am-ը Միքայել Մելքումյանից հետաքրքրվեց, թե արդյոք իրենք հաշվի առե՞լ են այս ռիսկերը: Պարոն Մելքումյանը նշեց, որ իրենք առաջարկել են, որպեսզի այդ համակարգը գործի 1 տարի ժամկետով, այսինքն` եթե փաստաթղթավորման գործիքը կիրառվում է, բայց խոշորը չի տալիս փաստաթուղթ, իսկ փոքր ձեռնարկությունն էլ ժամանակ չունի կամ պատրաստ չէ հայտնել այդ մասին, փակվում է: Իսկ կամավորականության սկզբունքով աշխատելու դեպքում՝ ով, որ վստահ է, որ փաստաթղթավորումով եւ 1 տոկոս շրջանառության հարկով կարող է աշխատել, աշխատելու է, իսկ ով, որ վստահ չէ, պետք է հետեւի արդեն իսկ այդ համակարգով աշխատողներին.
«Այդ անցումային փուլը մենք արագ կանցնեինք, ի վերջո կբերեինք լուծում կտայինք, շեմն էլ կբարձրացնեինք, որոշակի լուծումներ կլինեին: Ես համադրում եմ, թո՛ղ ոչինչ մի քիչ էլ դա շարունակվի, բայց ուսումնասիրենք 1 տոկոս անցնողների փորձը, տեսնենք՝ ինչպե՞ս է: Կարող է նրանք փակվում են, չի լինում, կարող է բարգավաճում են: Այդ մի տարին որեւէ բանի չի խանգարի»:
Կարդացեք նաև
Նա նշեց, որ պետք է մարդկանց հնարավորություն տալ հասկանալու համար, թե այդ պայմաններով իրենք կարո՞ղ են աշխատել, թե՞ իրենց ձեռնարկությունը փակվելու է. «Իսկ եթե փակում ես դա, ինքն անարդարության զգացումով է տոգորվում, մտածում է, որ իր նկատմամբ անարդարություն է տեղի ունեցել: Այդ պատճառով պետք է այնպես անել, որ այդ անցումը մեղմ լինի, դա գործիք էր այդ մեղմացումն ապահովելու համար»:
Ամի ՉԻՉԱԿՅԱՆ
