Միքայել Մելքումյանը համարում է, որ նման պայմաններում իշխանությունը պետք է արմատական փոփոխություններ նախաձեռնի
«Ամբողջ աշխարհում խոշոր հիպերմարկետները քաղաքից դուրս են»,- այսօր՝ հոկտեմբերի 4-ին, «Ֆորում» մամլո ակումբում լրագրողների հետ հանդիպման ընթացքում նկատեց ԲՀԿ խմբակցության պատգամավոր Միքայել Մկրտումյանը:
Իսկ Երեւան քաղաքի կենտրոնական հատվածում գործում է երկու մոլ, դա ըստ նրա՝ պետական քաղաքականության արդյունք է: Նա հավելեց, որ աշխարհում մարդիկ գնում են մոլեր ոչ թե գնելու 1 հագուստ, 1 հաց կամ 2 թթվասեր, այլ նրանք գնում են պատգարակներով երկու շաբաթվա առեւտուրն անելու համար.
«Մեր մոտ դա չկա, քանի որ վճարունակություն չկա: Եթե դու ունես 1 միլիոն աղքատ, մարդն ինչպե՞ս կարող է այդպիսի առեւտուր անել: Նշանակում է՝ այդ մոլերի առկայությունը մի կողմից հարվածեցին փոքր ձեռնարկություններին, մյուս կողմից իրենք էլ լավ չեն աշխատելու: Այսինքն՝ մենք այստեղ ունենք համակարգային խնդիր, որ Հայաստանի Հանրապետությունում վճարունակ պահանջարկի մակարդակը բավականին ցածր է, որը աղքատության, սոցիալական այլ քաղաքականության հետեւանք է, որը մենք արձանագրում ենք»:
Նման պայմաններում, Միքայել Մելքումյանը համարում է, որ կա՛մ իշխանությունը պետք է արմատական փոփոխություններ նախաձեռնի, կա՛մ էլ պետք է հայտարարի, որ չի կարողանում անել դա. «Եղբա՛յր, դու պետք է ընդունես, որ ձախողել ես: Դու 6.2 աճ ես ասել, 3.5 ես արել, հիմա էլ ասել ես, որ 5 տոկոս պետք է լինի, միջազգային կառույցներն ասում են, որ սպասումները 2.5 տոկոս են: Ի՞նչ անենք, ինչպե՞ս վարվենք: Պարզ չէ՞, որ պետք է արմատական փոփոխություններ լինեն»:
Ամի ՉԻՉԱԿՅԱՆ
