Սահմանադրական բարեփոխումների վերաբերյալ հասարակական կարծիքը պարզելու համար APR հասարակական հետազոտությունների կենտրոնը Հայաստանում հարցումներ է անցկացրել 1300 քաղաքացիների շրջանում:
Կենտրոնի ներկայացուցիչ Ռուբեն Սարգսյանը այսօր «Չեք անցկացնի» նախաձեռնության կազմակերպած քննարկման ժամանակ ներկայացրեց հարցումների արդյունքները:
Հարցվածների 46% տոկոսը տեղյակ է եղել նախատեսված սահմանադրական փոփոխություններից, 53,2% տեղյակ չի եղել :
Բարեփոխումների գործընթացի վստահության վերաբերյալ հարցին, հարցվածների 48% ասել է, որ բոլորովին չեն վստահում, ավելի շուտ չեն վստահում 33%, ավելի շուտ վստահում են 15%, եւ վստահողները 3% են կազմել:
Կարդացեք նաև
«Ակնհայտ երեւում է, որ մեծամասնությունը բարեփոխումներին չեն վստահում»,-նկատեց Ռուբեն Սարգսյանը:
Հարցվածների 60 % սահմանադրական փոփոխությունների կարիք չի տեսել: Կենտրոնը պարզել է նաեւ քաղաքացիների կարծիքը, թե փոփոխություններն ինչ կերպ կազդեն կյանքի որակի վրա: Հարցվածների 44,8 % ասել է՝ ոչինչ չի փոխվի, 23 % դրական ակնկալիքներ է տեսել:
«Չեք անցկացնի» նախաձեռնության անդամ Արմեն Գրիգորյանն էլ կարծիք հայտնեց, որ Հայաստանում սահմանադրական փոփոխությունների հանրային պահանջ չկա.«Հանրության 70% նման պահանջ չի ձեւակերպել, սահմանադրական փոփոխություններն այսօր Հայաստանի ամենամեծ մարտահրավերն է, որը կհանգեցնի երկրի խորը ճգնաժամին: Չի բացառվում, որ Հայաստանը այդ փոփոխություններից հետո բռնի Հյուսիսային Կորեայի ուղին»:
Արփինե ՍԻՄՈՆՅԱՆ
