Աբովյանի դատարան էր այսօր ներկայացել Վարդան Պետրոսյանի ավտովթարի գործով քաղաքացիական հայցվոր, գյուղատնտեսական ծրագրերի պետական հիմնարկի ներկայացուցիչ Հայկազ Կարապետյանը: Նա դարձյալ պնդեց 2 մլն 600 հազար դրամի հայցը եւ դատավոր Վաղինակ Մկրտչյանի հարցին, թե ի՞նչ սկզբունքներով է գնահատվել, որտեղի՞ց այդ գումարը, քաղհայցվորը պատասխանեց, որ ավտոմեքենայի գինը իրենք ճշտել են ինտերնետային կայքերից եւ այլ փաստաթղթեր գոյություն չունեն, ինքնուրույն են կատարել գնահատումը: Ինտերնետային կայքեր ասելով նա նկատի ուներ միայն Avto.am-ը:
Վարդան Պետրոսյանի պաշտպան Նիկոլայ Բաղդասարյանը ճշտեց, թե պահանջվող գումարը մեքենայի շուկայակա՞ն արժեքն է, հայցվորը պատասխանեց՝ այո եւ Նիկոլայ Բաղդասարյանը հղում անելով փորձագետի եզրակացությանը, որ հետվթարային վիճակում ավտոմեքենայի մնացորդային արժեքը կազմել է 737 հազար դրամ, հարցրեց, թե արդյոք մնացորդային արժեքը չպետք է հանվի շուկայականի գնից եւ այդ գումարն էլ պահանջվեր ԱՊՊԱ-ից, այլ ոչ թե Վարդան Պետրոսյանից: Քաղհայցվորը պատասխանեց, որ ԱՊՊԱ-ից իրենք գումար չեն ստացել եւ դեռ պարզ էլ չէ, թե քրեական գործով ո՞վ է մեղավոր կողմը:
Տուժող Արթուր Հակոբյանի ներկայացուցիչ Ռուբեն Բալայանն էլ ասաց, որ այստեղ պարզաբանման ենթակա հարց չկար, որ քաղհայցվորը 2 մլն 600 հազար է ուզում եւ ոչ թե 3 մլն եւ 400 հազար դրամն էլ զիջում է անում: Ըստ Բալոյանի, հայցվորի իրավունքն է՝ ումից պահանջի գումարը. ԱՊՊԱ-ից, թե՞ ամբաստանյալից: Մեղադրող Արթուր Սարգսյանն էլ ասաց, որ հայցադիմումի հարցը պետք է լուծվեր դատավճռով, այլ ոչ թե այսպիսի ընթացակարգով:
Կարդացեք նաև
Դատավորը հրապարակեց այս տարվա ապրիլի 4-ին Վարդան Պետրոսյանի պաշտպան Նիկոլայ Բաղդասարյանի միջնորդությունը ապացույցն անթույլատրելի ճանաչելու մասին: Դատական նիստն այս պահին ընդհատվել է, քանի որ մեղադրանքի կողմը ապացույցը «վերհիշելու» համար ժամանակ խնդրեց, իսկ Նիկոլայ Բաղդասարյանն էլ դիմեց դատարանին, որպեսզի թույլ տրվի իր հետ բերված հեռուստացույցը տեղադրվի դատական նիստերի դահլիճում՝ հաջորդ միջնորդության հետ կապված: Դատավոր Վաղինակ Մկրտչյանը պնդում էր, որ կարելի է ցուցադրումը կատարել համակարգչով, նաեւ ասաց՝ «մի կասկածեք դատարանի տեսողության վրա» եւ դիմեց դատական կարգադրիչներին, որպեսզի հեռուստացույցի փոխարեն դատարանի համակարգիչը տեղադրվի նիստերի դահլիճում:
Ռուզան ՄԻՆԱՍՅԱՆ
