Ինչպես արդեն տեղեկացրել ենք, Եվրոպայի խորհրդի խորհրդարանական վեհաժողովում (ԵԽԽՎ) շրջանառության մեջ էր դրվել ևս մեկ նախաձեռնություն, որում փաստվում էր Ադրբեջանում մարդու իրավունքների խայտառակ վիճակը:
Aravot.am-ի հետ զրույցում ԵԽԽՎ իրավական հարցերով հանձնաժողովի անդամ, ՀՀԿ խմբակցության պատգամավոր Արփինե Հովհաննիսյանը տեղեկացրեց, որ ԵԽԽՎ իրավական հարցերի հանձնաժողովը ընդունել է այս հայտարարությունը, որի հիման վրա շրջանառության մեջ է դրված ևս մեկ նախաձեռնություն` կապված Ադրբեջանում քաղբանտարկյալների հարցի հետ:
Արփինե Հովհաննիսյանը մեզ հետ զրույցում շեշտեց, թե այս նստաշրջանը հատկապես նշանավորվեց այն իմաստով, որ բոլորն անխնա քննադատում էին Ադրբեջանին` երկրում մարդու իրավունքների ոլորտում եղած խայտառակ վիճակի համար, հատկապես հաշվի առնելով այն հանգամանքը, որ ԵԽ նախարարների խորհրդի` Ադրբեջանի նախագահության ընթացքում ևս բազմաթիվ անձինք են ձերբակալվել: Արփինե Հովհանիսյանը մանրամասնեց. «Իրավական հարցերով հանձնաժողովն ընդունեց հայտարարություն` դատապարտելով այդ վիճակը: Իսկ դա նշանակում է ուշադրության կենտրոնում պահել այդ հարցը:
Զուգահեռաբար կա նաև նախաձեռնություն Ադրբեջանի նախագահության ընթացքում քաղբանտարկյալների մասով, որ հետո պետք է զեկույց դառնա: Շրջանառության մեջ դրվեց ևս մեկ նախաձեռնություն, ԵԽ հրավիրված փորձագետների մասով, որոնք բոլորը Ադրբեջան վերադառնալուց հետո ձերբակալվել են»:
Կարդացեք նաև
Արփինե Հովհաննիսյանի փոխանցմամբ` բացի պաշտոնական քննարկումներից՝ կազմակերպվել է նաև հարակից միջոցառում մի քանի ԵԽԽՎ պատվիրակների մասնակցությամբ, որի ընթացքում քննարկվել են Ադրբեջանում մարդու իրավունքների վիճակը և կաշառված պատգամավորների հարցը:
Արփինե Հովհաննիսյանը եզրափակեց. «Սա հատկապես կարևորում եմ, քանի որ ամբողջ ԵԽԽՎ-ն է խոսում այն խայտառակ կաշառակերության մասին, որ տիրում է Ադրբեջանի հետ կապված»:
Հավելենք, որ կան հստակ տեղեկություններ, որ եվրոպացի պատգամավորներից 128-ը ամեն ամիս պարտաճանաչ կերպով աշխատավարձ է ստանում Ադրբեջանի իշխանություններից:
Տաթև ՀԱՐՈՒԹՅՈՒՆՅԱՆ
ու ամենահետարքիքրը այն է, որ բոլորը միանգամից միահամուռ սկսեցին նկատել ազերիների խախտումները այն բանից հետո, երբ Ադրբեջանը անցում կատարեց Ռուսաստանի կողմը, ինչը սկսվեց զենքի առևտրից ու վերաջացավ ԱՄՆ-ին Կասպիս ծովից ռադ անելով: