«Ի սկզբանե հայտարարել էինք, որ գնում ենք մարզեր`ճշտելու ժողովրդի պատրաստակամությունը: Համաձայն եմ, օր-օրի հասունանում է իշխանափոխության ցանկությունը: Սերժ Սարգսյանն ու Հովիկ Աբրահամյանն իրենց թիմով նպաստում են այդ պահանջի հասունացմանը, քան մենք ենք անում»,- այսօր խորհրդարանական ճեպազրույցներում հայտարարեց ՀԱԿ խմբակցության քարտուղար Արամ Մանուկյանը:
Լրագրողներից մեկը նկատեց, որ «Ժառանգություն» խմբակցության ղեկավարը հանրահավաքներից տպավորություն է ստացել, որ ժողովուրդն իշխանափոխության պահանջ է դնում ու հետաքրքրվեց`ամսի 10-ին, քաղաքական ուժերը դա որպես քաղաքական պահանջ կձեւակերպե՞ն:
Իբրեւ իր դիտարկման հավաստիացում, որ նախագահն ու վարչապետն իրենց թիմերով նպաստում են իշխանափոխության պահանջի հասունացմանը, Արամ Մանուկյանն օրինակ բերեց վերջին քառօրյայում մերժված արտահերթ նիստերը, որոնցից մեկն էլ «Շրջանառության հարկի մասին» օրենքի կիրարկման առաջացրած դժգոհության ալիքին ու օրենքում փոփոխություններ կատարելուն էին վերաբերվում: Նա «մինուս» համարեց նաեւ «Արտակարգ դրության ռեժիմի մասին» ՀԱԿ-ի ներկայացրած նախագծի մերժումը, որը վերաբերվում է զինված ուժերի կիրառմանը քաղաքական գործընթացներում: «Միտինգները գնալով կլինեն ավելի ագրեսիվ ու պահանջատեր, քանի որ իշխանությունն է մղում դրան: Ամսի 10-ին նոտաները շատ ավելի բարձր կլինեն»,- ասաց նա:
Ճշտող հարցին` իշխանափոխության պահանջ կդրվի՞, Արամ Մանուկյանը պատասխանեց. «Ես դա տեսնում եմ»:
Կարդացեք նաև
Նելլի ԳՐԻԳՈՐՅԱՆ
