«Մենք տեղյակ չէինք խնդիրներին, որոնք ներկայացվեցին այնտեղ»,- այսօր՝ հոկտեմբերի 3-ին, «Նոյյան տապան» մամլո սրահում լրագրողների հետ հանդիպման ընթացքում, անդրադառնալով երեկ վարչապետ Հովիկ Աբրահամյանի հետ տեղի ունեցած հանդիպմանը, հայտարարեց «Փոքր ձեռներեցությամբ զբաղվողների հայկական միության» նախագահ Ստեփան Ասլանյանը:
Նրա խոսքերով՝ կատարվածը փոքր ձեռնարկություններին չէր առնչվում: Նա նշեց, որ վարչապետին հանձնվել է մի փաստաթուղթ, որոնցից իրենք նույնիսկ տեղյակ չէին: Պրն Ասլանյանը հավելեց, որ փոքր ձեռներեցները քննարկել են խնդիրը եւ որոշել են երկուշաբթի օրվանից շարունակել իրենց բողոքի ակցիաները թե՛ Երեւանում, թե՛ Հայաստանի այլ մարզերում.
«Մենք կարծում ենք, որ մեր մեջ կան միջին բիզնեսի ներկայացուցիչներ, եւ հավանաբար նրանք էին այդ հարցը բարձրացրել եւ քննարկել ներսում: Մեր պահանջն, ինչպես եղել է առաջին օրվանից, շարունակում է մնալ նույնը: Մենք առաջարկում ենք կա՛մ կասեցնել «Շրջանառության հարկի մասին» օրենքը, կա՛մ երկու օրենքները թողնել ուժի մեջ՝ թե՛ նախկինը եւ թե՛ նորը, որպեսզի տնտեսվարողներն ազատ հնարավորություն ունենան օգտվելու երկու հարկադրույքներից էլ»:
Ստեփան Ասլանյանը նշեց, որ կապվել են հանրապետության մյուս փոքր բիզնեսի ներկայացուցիչների հետ, նրա խոսքերով՝ վերջիններս չեն դադարելու իրենց բողոքը:
Կարդացեք նաև
«Այս օրենքով փոքր բիզնեսը չի կարող գործել: Ես ուզում եմ հավատալ վարչապետի խոսքին, որն ասաց փոքր բիզնեսին դա վտանգ չի սպառնում, սակայն նաեւ հասկանալով մեր իրականությունը պետք է լինեն հստակ երաշխիքներ, որի արդյունքում փոքր բիզնեսը կարող է հանգիստ շունչ քաշել, այլապես՝ բողոքի ակցիաները շարունակվելու են»:
Ամի ՉԻՉԱԿՅԱՆ
