«Շրջանառության հարկի մասին» նոր օրենքը հանգիստ չի տալիս գյումրեցի առևտրականներին: Վերջիններս այսօր Գյումրու կենտրոնական շուկայից ոտքով շարժվեցին դեպի Շիրակի մարզպետարան:
Սկզբում նրանց հետ հանդիպման իջավ Շիրակի մարզպետարանի աշխատակազմի ղեկավար Խաչատուր Պողոսյանը: Այնուհետ կենտրոնական փողոցը փակելուց հետո առևտրականներին ընդունեց նաև Շիրակի մարզպետ Ֆելիքս Ցոլակյանը: Մարզպետի կաբինետում էր նաև Շիրակի մարզի ոստիկանապետ Վարդան Նադարյանը:
Մարզպետն ասաց, որ այստեղ անելիք ունեն մասնագետները, բայց քանի որ առևտրականները շիրակցի են, նույն տեղանքից, ուստիև պատրաստ է լսելու նրանց բողոքը:
Կարդացեք նաև
Կոշիկի բիզնեսով զբաղվող տնտեսագետներից մեկն ասաց. «Պարոն մարզպետ, այս օրենքը, ճիշտն ասած, շատ դիկտատորական օրենք է, և ուզում ենք, որ այն ոչ թե սառեցվի, այլ չեղյալ հայտարարվի: Ասում են իջեցրել ենք սանդղակը մեկ տոկոս, բայց էնքան փաստաթղթեր են ուզում, էդքան ստուգումներ, որ անհատ ձեռներեցի համար աբսուրդ է: Եվ ասում են` դուք հարթակ եք մեզ համար, որ գտնենք խոշոր բիզնեսին: Ի՞նչ է կառավարության ղեկավարը կամ մնացածները չգիտե՞ն խոշոր բիզնեսի տեղը:Մենք մանր բիզնես ենք, ընտանիք ենք պահում: Էս պետությունը ոչ թե նպաստում է բիզնեսը զարգացնելուն, այլ կործանելուն:Բոլոր երկրներում հարկատուներին ձեռքի վրա են պահում, իսկ էստեղ ի՞նչ են տվել, գո՞րծ են տվել, մենք մեր ձեռքով գործ ենք ստեղծել, ի՞նչ են ուզում»:
Բողոքավորներից մեկն էլ ասաց, որ հարկերից թաքնվող խոշոր հարկատուներին գտնելու համար կան իրավապահ մարմիններ:
Ի պատասխան, մարզպետը հիշեցնում էր, որ հարկային մարմիններին հանձնարարված է առևտրականներին չանհանգստացնել:
Այնուհետ մարզպետը առանց լրագրողների զրուցեց բողոքավորների հետ: Վերջիններս մարզպետի կաբինետից դուրս եկան բավական դժգոհ` ուղևորվելով ՀՀԿ-ական պատգամավոր Սուքիաս Ավետիսյանի գրասենյակ: Այստեղ հանդիպումը պատգամավորի հետ վերածվեց իսկական միտինգի:
Մանրամասները` տեսանյութում
Նունե ԱՐԵՎՇԱՏՅԱՆ
