Սյունիքի մարզի ընդհանուր իրավասության դատարանի Գորիսի նստավայրում այսօր Արտակ Բուդաղյանի գործով` նշանակված հերթական դատական նիստի ժամանակ Բուդաղյանի պաշտպան Հայկ Ալումյանը դատավորին բացարկ ներկայացրեց` հիմնավորելով, որ Սուրիկ Խաչատրյանին կրկին մարզպետ նշանակելուց հետո Սյունիքում այս գործով օբյեկտիվ ու անաչառ դատավարություն անցկացնելն անհնար է:
«Սուրիկ Խաչատրյանն ասաց, որ շնորհակալություն է հայտնում, որ համագործակցում է եւ շարունակելու է համագործակցել Սյունիքի ազգային անվտանգության պետի հետ, Սյունիքի դատախազի հետ, Սյունիքի ոստիկանապետի հետ: Հասկանո՞ւմ եք, ինքը համագործակցել է եւ շարունակելու է համագործակցել ոստիկանապետի հետ, որի ղեկավարած ոստիկանությունը դեպքից անմիջապես հետո խեղաթյուրում է ամեն ինչ: Բայց որ ես այդ համագործակցության մեջ մտնեմ, ես ի՞նչ հնարավորություն ունեմ: Այդ պատճառով ես ուզում եմ ինքնաբացարկ ներկայացնել հաջորդ դատական նիստի ընթացքում», – այս մասին ավելի վաղ հայտարարել էր` պարոն Ալումյանը:
Դատավոր Նապոլեոն Օհանյանը մերժեց ներկայացրած բացարկը, իսկ Հայկ Ալումյանը իր անհամաձայնությունը հայտնեց ու լքեց դատարանի դահլիճը` պնդելով, որ նման պայմաններում փաստաբանական ծառայությունները հավուր պատշաճի չի կարող իրականացնել:
Ի դեպ, այսօր կրկին դատարան չէր ներկայացել Սուրիկ Խաչատրյանի որդին` Տիգրան Խաչատրյանը, թեեւ դատարանը որոշել էր նրան բերման ենթարկելու որոշումն անփոփոխ թողնել:
Կարդացեք նաև
Մանրամասները` շուտով:
Մերի ՍՈՂՈՄՈՆՅԱՆ
Տեսանյութը՝ Yerkir videonews-ի
