ՀՀ-ում ՌԴ նախկին դեսպան Վյաչեսլավ Կովալենկոյի վերջին սպառնալիքներն այն մասին, որ եթե Հայաստանը ճիշտ չկողմնորոշվի, ասել է թե՝ դեպի Եվրասիական տնտեսական միություն, ապա կկորցնի ոչ միայն իր պետությունը, այլ բարբարոս ամերիկացիների եւ եվրոպացիների թեթեւ ձեռքով իբրեւ ազգ կկանգնի ոչնչացման եզրին, լցրել են հայ խորհրդարանականների համբերության բաժակը:
Մի քանի օր առաջ կայացած ՀՀ ԱԺ արտաքին հարաբերությունների հանձնաժողովի նիստում «Ժառանգություն» խմբակցության պատգամավոր Թեւան Պողոսյանն առաջարկել է, որպեսզի հանձնաժողովն իր դիրքորոշումը հայտնի այն ռուս պաշտոնյաների հայտարարությունների վերաբերյալ, ովքեր իրենց թույլ կտան վիրավորական եւ սպառնալիք ներկայացնող արտահայտություններով խոսեն հայերի եւ ՀՀ-ի մասին:
Aravot.am-ի հետ զրույցում պարոն Պողոսյանը չցանկացավ քննարկման մանրամասներին անդրադառնալ. «Փակ քննարկում է եղել, չեմ ցանկանում որեւէ մի բան ներկայացնել փակ քննարկումից: Ինձ թվում է ուղղակի, որ այլեւս մենք ավելի ուշադիր կլինենք եւ բոլոր այդ տեսակի երեւույթները անարձագանք չեն մնա»:
Կարդացեք նաև
Հիշեցնենք, պարոն Կովալենկոն եզակի ռուս պաշտոնյա չէ, ով նման կերպ սպառնալիքներով խոսեց: Նրանից առաջ, հենց ՀՀ խորհրդարանում, իրեն բավական ցինիկ էր պահել նաեւ Դմիտրի Կիսիլյովը:
Նելլի ԳՐԻԳՈՐՅԱՆ
