Այսօր Կամերային երաժշտության տանը կկայանա բանաստեղծ, թարգմանիչ եւ գրականագետ Արտեմ Հարությունյանի հոբելյանական երեկոն: Aravot.am-ի հետ զրույցում բանաստեղծն ասաց, որ կկարդա հատվածների իր վաղ եւ վերջին շրջանի ստեղծագործություններից:
Հետաքրքրվեցինք՝ իրեն գնահատված համարո՞ւմ է: Արտեմ Հարությունյանի ձեւակերպմամբ. «Մեծ մասամբ գրողներին, թվում է, թե իրենք ավելին են, իմ պարագայում այո՛, ես ավելին եմ, չնայած ինչ խոսք, լրիվ չենք գնահատվում, անտաղանդների պատճառով կորցրել ենք մեր հիմնական լսարանը, հայ ընթերցողներից շատերը դեռ թափառում են «Ես քո սիրով, դու ուրիշի» բանաձեւի ներքո, նեյնիմ են սիրում, մորմոքումներ, աշխարհն էս ի՞նչ է… Չկա առարկայական պատկերում, որը մեր պոեզիայի թուլություններից մեկն է, չկա էպոխան: Ինչ վերաբերում է ինձ, գտնում եմ, որ ահագին բան բերել եմ, փոխել եմ ինչ-որ չափով իմ սերնդի հետ միասին՝ հայ պոեզիայի դեմքը, ջնջել պատմության եւ պոեզիայի միջեւ ընկած ցանկապատը»:
Ընդդիմախոսներին Արտեմ Հարությունյանը խորհուրդ է տալիս զարգանալ: «Իմ շատ ընդդիմախոսներ վատ վիճակում են, որովհետեւ ճաշակ չի զարգացել, գալիս են ցածրորակ ընտանիքներից ու ցածրաճաշակ ընթերցումներից, ընդհանրապես չեն ընթերցել՝ իրենց ուղեղը համարելով իմաստության շտեմարան: Նրանցից շատերի ուղեղներում հնության մումիատիպ որդեր են ու մեռած է պոեզիան»,-իրեն բնորոշ սարկազմով ասաց Արտեմ Հարությունյանը:
Գոհար ՀԱԿՈԲՅԱՆ
Այս մարդուց շատ բան ունեն սովորելու շատերը: