Մարզային հանրահավաքների ժամանակ հնչում են տարբեր կոչեր, ընդհուպ «Սեր-ժիկ, հեռացիր», իշխանափոխության պահանջ։ Եվ կարիք կար արձանագրելու, թե արդյո՞ք սա Եռյակի միասնական մոտեցումն է, եւ եթե այո, ի՞նչ է նշանակում այդ մոտեցումը։ Այս ֆոնին, ահա, Ծառուկյանն ասում է, որ իրենց կուսակցության օրակարգում ոչ իշխանական ուժերի 12 կետերն են։ Ինչպես հիշում եք, այդ կետերի մեջ ոչինչ չկա իշխանափոխության եւ Սերժ Սարգսյանի հեռացման մասին։ Դրանք հիմնականում տնտեսական բնույթի պահանջներ են եւ ուղղված են կառավարությանը։
Դեմիրճյանի հետ հանդիպման ժամանակ Ծառուկյանն ասում է. «Մենք ուզում ենք հանրության, ժողովրդի հետ հիմնականում քննարկել 12 կետերը եւ Սահմանադրության փոփոխումը, որ տեսնենք՝ ժողովրդի մոտեցումը, տեսակետը որն է, որ ըստ այնմ մենք ընդհանուր մեծ հանրահավաք անենք եւ համապատասխան՝ ոչ թե արդեն դրանք կուսակցության առաջարկներն են, այլ ժողովրդի առաջարկները։ Հուզող ամենակարեւոր կետերն են այդ 12 կետերը, հիմնական բանկային համակարգը, կուտակայինը, փոքր-միջին բիզնեսի հարկերի բարձրացում։ Դրանք առաջիկա 12-ն են, 12-ը կատարելով՝ կանցնենք մյուս 12-ին»,- ասել է Ծառուկյանը։ Ինչպես տեսնում եք՝ ոչ մի խոսք, ակնարկ իշխանափոխության, «Սեր-ժիկ հեռացիր»-ի մասին, եւ նույնիսկ կարող է տպավորություն ստեղծվել, որ ԲՀԿ նախագահ Գագիկ Ծառուկյանը սկսել է իր ներքաղաքական զադնիների շարքը։ Ինչո՞ւ ենք ասում տպավորություն։ Որովհետեւ տեսականորեն, միայն տեսականորեն՝ չի կարելի բացառել, որ վերը շարադրվածն ընդամենը մարտավարական մանյովրներ են, եւ հոկտեմբերի 10-ի հանրահավաքում դիրքորոշման կտրուկ կոշտացում տեղի կունենա, եւ Եռյակը հանդես կգա իշխանափոխության պահանջով։ Զուտ տեսականորեն՝ սա բացառել չի կարելի, որովհետեւ ՀԱԿ եւ «Ժառանգության» ներկայացուցիչները մինչեւ ս/թ հոկտեմբերի 24-ը ամեն օր Ազատության հրապարակում հանրահավաք անցկացնելու մասին իրազեկում են ներկայացրել։
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
