ԱԺ ՀԱԿ խմբակցության պատգամավոր Լյուդմիլա Սարգսյանը պնդում է, որ միայն ՀՀԿ-ին է հատուկ քաղաքացիներին պարտադրելով հանրահավաքների տանել:
Անդրադառնալով ԿԳ նախարար Արմեն Աշոտյանի հայտարարությանը, թե Սիսիանի հանրահավաքին պարտադրել էին դպրոցների ոչ ՀՀԿ-ական ներկայացուցիչներին մասնակցել, տիկին Սարգսյանը զարմացավ.«Զարմացած եմ նախարարի ասածից, հատկապես, որ մեր երկրում բոլոր ուսուցիչները, բոլոր դպրոցական կոլեկտիվները Աշոտյանի եւ ՀՀԿ-ի վերահսկողության տակ են: Հանրապետականացված են բոլորը: Եթե նրա ասածը համապատասխանում է ճշմարտությանը, ուրեմն ՀՀԿ-ի նավը խորտակվում է, որ հանրապետականանացված ուսուցչական կոլեկտիվները մասնակցել են: Ես տեղյակ եմ, որ հանրահավաքին մասնակցել են Հայաստանի մտահոգ քաղաքացիները, որոնք ձգտում են բարեփոխման: Ծիծաղելի է , որ Աշոտյանը կարող է մտածել, որ պարտադրաբար կարող ենք հանրահավաքի տանել, առավել եւս՝ իրենց վերահսկողության տակ գտնվող կոլեկտիվներին: Երեւի շփոթել է ՀՀԿ-ին ընդդիմադիր քաղաքական ուժերի հետ: Իրենց է հատուկ ճնշման ներքո ու պարտադրանքով իրենց ազդեցության տակ գտնվող կազմակերպությունների ներկայացուցիչներին, նույնիսկ բռնի ուժով ավտոբուսներով տեղափոխել այստեղից այնտեղ, որ քիչ թե շատ ներկայանալի երեւան: Մենք նման խնդիր չունենք, որովհետեւ ամբողջ հասարակությունը զզված է իշխանություններից եւ ոչ մի հույս չի կապում ՀՀԿ-ի հետ ու օր առաջ ուզում է ազատվել ՀՀԿ-ական ռեժիմից: Հետեւաբար,Աշոտյանի ակնարկները խոսում են այն մասին, որ իրավիճակը այլեւս չեն կարողանում վերահսկել»:
Պատգամավորի խոսքով՝ Արմեն Աշոտյանը մոռացել է, որ ուսուցիչը նույնպես Հայաստանի քաղաքացի է ու իրավունք ունի իր դժգոհությունն արտահայտել. «Քանի որ մեր երկրում, ինչպես ՀՀԿ-ականներն են ասում, բացարձակ ժողովրդավարություն է տիրում, հարց է առաջանում, եթե այսօր Սահմանադրության կետերը չեք հարգում, ի՞նչն եք ուզում փոխել, ինչո՞վ այս սահմանադրությունը ձեզ խանգարում, որ հետեւեք սահմանադրության սկզբունքներին: Նման նպատակ կարող է ունենալ միայն մի իշխանություն, որն ավելի է ուզում հարմարեցնել Սահմանադրությունն իր նպատակներին»:
Արփինե ՍԻՄՈՆՅԱՆ
Կարդացեք նաև
