Ինչպես արդեն տեղեկացրել ենք՝ երեկ ոչ իշխանական Եռյակը Սյունիքում հանրահավաքներ է անցկացրել մարզի Սիսիան եւ Կապան քաղաքներում: Կազմակերպիչներից հետաքրքրվեցինք, թե ինչո՞ւ Եռյակը շրջանցեց Գորիսը եւ այնտեղ հանրահավաք չանցկացրեց: Արդյոք հաշվի՞ է առնվել այն հանգամանքը, որ Գորիսում հնարավոր է մարդիկ վախից ելնելով հրապարակ դուրս չգային:
«Ես չեմ ուզում այդպես մեկնաբանել, բայց կասեմ, որ միշտ Կապանն ավելի ազատ է դրսեւորել իրեն, կապանցին շատ ավելի չի ենթարկվել ղեկավարության ճնշումներին, դրա ապացույցն էլ 2013թ.-ի նախագահական ընտրությունների արդյունքներն են », – մեր հարցին ի պատասխան նշեց ԱԺ «Ժառանգություն» խմբակցության ղեկավար Ռուբեն Հակոբյանը եւ հավելեց, որ ժամանակի խնդիր կար, եւ այս ժամանակահատվածում Հայաստանի միայն 8 քաղաքում է նախատեսված եղել հանրահավաք կազմակերպել: «Այս հանրահավաքները նախապատրաստական հանրահավաքներ են, որ պետք է նախապատրաստեն հոկտեմբերի 10-ին: Չեմ կարծում, որ հոկտեմբերի 10-ով կավարտվի, այնպես որ շատ ու շատ քաղաքներ կան, որտեղ մենք հետագայում կլինենք»,- նշեց պարոն Հակոբյանը:
Իսկ ԲՀԿ պատգամավոր Տիգրան Ուրիխանյանը պատասխանեց, որ հանրահավաք կազմակերպել են սփռված մարզի երկու կողմում էլ: Հանրահավաքը բոլորի համար բաց էր` այդ թվում նաեւ գորիսեցիների: Իսկ մեր հարցին, թե միայն մարզի սփռված լինելո՞վ էր պայմանավորված Գորիսում հավաք չանցկացնելը, վերջինս պատասխանեց. «Բոլորին հնարավորություն է տրված ներկա գտնվել մեր հանրահավաքներին, ոչինչ չի խանգարում, որպեսզի գորիսեցիները մասնակցեն: Վախի հետ կապված որեւիցե բան հաշվի չի առնվել եւ հաշվի չի առնվելու»,- ասաց Կապան այցելած պարոն Ուրիխանյանը:
Ինչպես նկատելի էր` ԲՀԿ-ի, «Ժառանգության», ՀԱԿ-ի կազմակերպած համատեղ հավաքին Կապանում համեմատաբար քիչ մարդ էր մասնակցում, այնինչ նախկին հանրահավաքներին` հատկապես Րաֆֆի Հովհաննիսյանի մասնակցությամբ անցկացվող հավաքներին, հրապարակը մարդաշատ էր լինում: Տարբեր կարծիքներ են շրջանառվում, որ շատերը վախեցել են ներկայանալ` աշխատանքից չզրկվելու համար կամ կորցրել են հավատն ու վստահությունը` երկրում որեւէ բան փոխելու ցանկացած գործընթացի հանդեպ: Ռուբեն Հակոբյանը, թերեւս համամիտ չէ նշված կարծիքների հետ. «Կարծում եմ համեմատությունը տեղին չէ, քանի որ Րաֆֆի Հովհաննիսյանի ժամանակ հանրահավաքները նախընտրական շրջանում էր, իսկ այսօր նախապատրաստական հավաքներ են: Ես չեմ կարծում, թե այսօր քիչ են հավաքվածները, իսկ անվստահության պահը, թերեւս կերեւա հոկտեմբերի 10-ին», – ասաց «Ժառանգության» ներկայացուցիչը:
Կարդացեք նաև
Մերի ՍՈՂՈՄՈՆՅԱՆ
