Դանիել Իոաննիսյանի կարծիքով` Հայաստանը` որպես Իրանի դաշնակից, իրեն վատ պահեց:
«Լուրջ խնդիրներ կլինեն միջազգային առաքանիների մաքսազերծման հետ կապված»,- Aravot.am-ի հետ զրույցում, անդրադառնալով Եվրասիական տնտեսական միությանը միանալու Հայաստանի պայմանագրի նախագծին , հայտարարեց «Իրազեկ քաղաքացիներ միավորման» ծրագրերի համակարգող Դանիել Իոաննիսյանը:
Ըստ նրա` լուրջ խնդիրներ կլինեն տարբեր ռեժիմներով Հայաստան ներմուծվող ապրանքների ձեւակերպումների հետ կապված: Նա նշեց, որ իրանական տարբեր կազմակերպություններ, որոնք Հայաստանի տարածքով տարբեր ապրանքներ են տեղափոխում, եւս խնդիրներ կունենան. «Մենք` որպես Իրանի դաշնակից, մեզ վատ պահեցինք` հաշվի չառանք, որ Իրանն այս մասով մեր դաշնակիցն է, իրենց շահերը հաշվի չառանք»:
Նա համարում է, որ պայմանագրի դրական կողմեր դժվար է գտնել, քանի որ պայմանագիրը շատ բացասական է: Սակայն, ըստ նրա, դրական է այն հանգամանքը, որ շաքարավազի հումքը 10 տարի չթանկանալու. «Եթե մենք չստորագրենք՝ ընդհանրապես չի թանկանա, ոչ միայն տաս տարվա ընթացքում, այլ՝ երբեք: Եթե մեր պետությունը որոշի թանկացնել, դա արդեն մեր գործը կլինի, իսկ այսպես կրկին որոշողը Եվրասիական տհնտեսական միությունն է լինելու, Մոսկվան է լինելու»:
Կարդացեք նաև
Դավիթ Իոաննիսյանը զավեշտալի է համարում այն հանգամանքը, որ շաքարավազի հումքի հարցի բանակցություններն ընթացել են այնքան լուրջ մակարդակով, որ այն տեղ է գտել պայմանագրի երրորդ հավելածում` զինտեխնիկայի, օդանավերի հետ միասին`ի տարբերություն բոլոր սննդամթերքների, որոնք տեղ են գտել 4-րդ հավելվածում .«Դա շատ հետաքրքիր է, որ բանակցողները շատ լուրջ պաշտպանել են շաքարավազի հումք ներմուծողների շահերը` ի տարբերություն դեղորայքի, ավտոմեքենաների, սերմացուի: Շատ զվարճալի է, որ շաքարավազն այդպիսի ուշադրության է արժանացել»:
Ամի ՉԻՉԱԿՅԱՆ
