Այսօր նախատեսված էր ԱԺ արտահերթ նիստ հրավիրել՝ ՕԵԿ- ի նախաձեռնությամբ: Պետք է քննարկվեր «ԴԱՀԿ մասին» ու հարկային մի շարք օրենքներում փոփոխություններ կատարելու մասին փաթեթը:
ՀՀԿ խմբակցության ղեկավար Վահրամ Բաղդասարյանը նախօրոք հայտարարել էր, որ այդ օրենքների վերաբերյալ Սահմանադրական դատարանում առկա է մարդու իրավունքների պաշտպանի դիմումը, եւ այս տարվա նոյեմբերի 25-ին ՍԴ-ում նիստ է լինելու այդ մասին: Ուստի իրենք չեն մասնակցելու այդ նիստին: Նա առաջարկեց առայժմ ձեռնպահ մնալ այդ օրենքների քննարկումից, եւ այն քննարկել Սահմանադրական դատարանի որոշումից հետո:
ՕԵԿ-ի հրավիրած արտահերթ նիստին ներկա էր ընդամենը 32 պատգամավոր, բնականաբար, քվորում չապահովեց եւ նիստը համարվեց փակված:
Կարդացեք նաև
Չնայած չմասնակցելու վերաբերյալ հայտարարություն արել էր միայն ՀՀԿ-ն, բայց ոչ իշխանական ուժերի շարքերն էլ նոսր էին: «Բա դո՞ւք ինչի եք բոյկոտել»,- ոչ իշխանականներին հարցրեց ԱԺ նախագահ Գալուստ Սահակյանը՝ վստահեցնելով, որ արտահերթ նիստի մասին հայտարարել է առավոտյան, երբ այդ թեւի պատգամավորները 60 հոգի էին:
Հռիփսիմե ՋԵԲԵՋՅԱՆ
