Սեպտեմբերի 30-ին «Արամ Խաչատրյան» համերգասրահում տեղի կունենա աշխարհահռչակ ջութակահար և մանկավարժ Զախար Բրոնի (Գերմանիա) և մեծանուն դաշնակահար Վահագն Պապյանի (Իսրայել) համերգը՝ Հայաստանի պետական երիտասարդական նվագախմբի ընկերակցությամբ:
«Սա ինձ համար շատ պատասխանատու համերգ է և, միևնույն ժամանակ, առանձնահատուկ նշանակություն ունի, քանի որ ես Զախար Բրոնի աշակերտներից մեկն եմ»,- այսօր լրագրողների հետ հանդիպման ժամանակ ասաց Հայաստանի պետական երիտասարդական նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը:
Զախար Բրոնն արդեն երկրորդ անգամ է այցելում Հայաստան: Առաջին անգամ մեր երկրում եղել է երեսուն տարի առաջ. «Ինձ ինչ-որ բան հուշում է, որ տաղանդավոր երաժիշտների եմ հանդիպելու Հայաստանում: Իսկ դա շատ հաճելի զգացողություն է, տաղանդավոր երիտասարդների տեսնելիս ես, կարծես թե, վերածնվում եմ: Իմ բախտն այդ առումով շատ է բերել. ինձ մոտ տաղանդավոր հայեր էլ են սովորել: Երևի ինչ-որ տաղանդ ունեմ այս ոլորտում: Ցանկացած գործում քո մտքերը, գաղափարներն իրականացնելու համար նյութ է պետք, ես երբեք այդ նյութի պակասը չեմ զգացել»,- ասում է Զ. Բրոնը:
Դաշնակահար Վահագն Պապյանն էլ ընդգծեց, որ երիտասարդական նվագախմբերի հետ աշխատելը իրեն մեծ հաճույք է պատճառում. «Նրանք շատ աշխատասեր են, նման եռանդով աշխատելը բնորոշ է միայն երիտասարդական նվագախմբերին»,- ասաց նա:
Նշենք, որ համերգը կազմակերպվում է Արամ Խաչատրյանի անվան 2-րդ միջազգային փառատոնի շրջանակներում և նվիրվում է ջութակահար Ավետ Գաբրիելյանի 115-ամյակին:
Համերգին մասնակցում է նաև 15-ամյա, բայց արդեն հանրահայտ ջութակահար Մոնե Հաթորին (Ճապոնիա), որը Զ. Բրոնի սաներից է: Նա խոստացավ սովորել և նվագել Արամ Խաչատրյանի ստեղծագործությունները:
Կարդացեք նաև
«Մենք Մոնեի հետ անակնկալ ենք պատրաստել, բայց, բնականաբար, ես դրա մասին այսօր չեմ խոսի: Միայն ուզում եմ վստահեցնել, որ շատ հետաքրքիր ծրագիր ենք պատրաստել»,- ասաց Ս. Սմբատյանը՝ տեղեկացնելով, որ ծրագրում կհնչեն Յոհան Սեբաստիան Բախի Կրկնակի կոնցերտը երկու ջութակի, լարային նվագախմբի և բասսո կոնտինուոյի համար (մենակատարներ՝ Զախար Բրոն, Մոնե Հաթորի), Հենրիկ Վենյավսկու Ջութակի թիվ 1 կոնցերտը (մենակատար՝ Մոնե Հաթորի), Էդվարդ Գրիգի Դաշնամուրի կոնցերտը (մենակատար՝ Վահագն Պապյան):
Սիրանուշ ՀԱՅՐԱՊԵՏՅԱՆ
