«Սպառնալիքները հնչում են, և մեր հասարակությունը շարունակում է հանդուրժել»,-Aravot.am-ի հարցին՝ մինչև ե՞րբ պետք է մեր հանրությունը, քաղաքական ուժերն ու իշխանությունները հանդուրժեն ռուսական կողմից հնչող սպառնալիքները. օրերս ՀՀ-ում ՌԴ նախկին դեսպան Վյաչեսլավ Կովալենկոն էլ Հայաստանին սպառնաց պետականության կորստով, լրագրողների հետ հանդիպմանն այսպես արձագանքեց քաղաքացիական ակտիվիստ Գայանե Առուստամյանը:
Նրա համար ամենազարմանալին է ոչ իշխանական քաղաքական ուժերի պահվածքը, նրանց լռությունը: Այս առիթով Գայանե Առուստամյանն ասաց. «Պետականության կորստի մասին ակնհայտ սպառնալիքը գոնե արձագանք պիտի ենթադրեր այդ ոչ իշխանական ուժերի առաջնորդների կողմից: Բայց չի հնչում, և այդ լռությունը ենթադրում է, որ նրանք նույնպես համաձայն են, որ ՀՀ-ն գնա դեպի այդ կործանարար գործընթաց՝ Եվրասիական տնտեսական միություն և ամբողջությամբ կուլ գնա ՌԴ-ին՝ ենթարկվելով էքսպանսիայի և դառնալով ՌԴ-ի ընդամենը արոտավայրը կամ արվարձանը»:
Հանրային հարթակից հնչող առարկությունները, ըստ Գայանե Առուստամյանի, խլանում են համատարած աղմուկի մեջ. «Քարոզչության միջավայրում հայ հասարակությանը դեպի Ռուսաստան ուղղելու այդ աղմուկի մեջ հանրային հարթակից հնչող ձայները նույնպես խլացան: ՀՀ հանրությունը քարոզչական ճնշման տակ է, որը խտացված է մեկ ձևակերպման մեջ՝ ռուսը չլինի, թուրքը մեզ կուտի»:
Գայանե Առուստամյանն ահազանգեց, թե ՌԴ-ից հնչող սպառնալիքներն, ի վերջո, առարկայանալու են, եթե լռենք ու հակահարված չտանք: Ուղղակի զանգվածաբար պիտի առարկենք այդ ճնշումներին»:
Կարդացեք նաև
Հարցին՝ իսկ իշխանական օղակներն այդտեղ անելիքներ չունե՞ն, օրինակ՝ ԱԳ նախարարությունը, տիկին Առուստամյանը պատասխանեց. «Ես այլևս իշխանության հետ որևէ հույս չեմ կապում, քանի որ իշխանությանը իշխանություն չեմ համարում, և բնական է, որ ոչ լեգիտիմ խունտա է, որ կառավարում է երկիրն ու տանում դեպի Ռուսաստան: Ես այդ իշխանություններից ակնկալիքներ չունեմ: Իշխանությունները չեն արձագանքում, քանի որ Կրեմլի խամաճիկներն են»:
Գրող, կինոսցենարիստ Վահրամ Մարտիրոսյանը ռեպլիկի կարգով ասաց. «ԱԳՆ-ից միայն վիզաների բաժինը կարելի է թողնել, որ մուտքի վիզա տան ու առնեն»:
Տաթև ՀԱՐՈՒԹՅՈՒՆՅԱՆ
