«Հայաստանի և Եվրամիության միջև էական գործընկերության տիրույթ դեռևս կա, սակայն այն կախված կլինի նրանից, թե ինչքանով բացառիկ կլինեն կովկասյան այս երկրի հարաբերությունները Եվրասիական տնտեսական միության հետ՝ որպես Ռուսաստանի այլընտրանքային առևտրային դաշինքի նախագիծ»,-ասում են Բրյուսելում՝ «Արմյանսկի վեստնիկ» կայքի փոխանցմամբ, որն իր հերթին տեղեկատվությունը քաղել է eurasianet.org էլեկտրոնային պարբերականից: Վերջինիս վերլուծաբան Գեորգի Լոմսաձեի մեկնաբանությամբ «խանդոտ սիրեկան» Ռուսաստանը բացառիկ մոտեցման է ձգտում իր հանդեպ: Եթե Հայաստանը ԵՏՄ հանդեպ անտարբերություն ցուցաբերի, դա կարող է Ուկրաինայի իրադարձությունները հիշեցնող հեղաշրջում նշանակել, ինչի մասին այս շաբաթ զգուշացրել էր ռուսական բանբերը:
«ԵՄ-ի հետ մերձեցումը հանուն ԵՏՄ-ի խզելուց մեկ տարի անց Հայաստանը, փորձելով գործնականում կիրառել իր շախմատային վարպետությունը, ջանացել է պահպանել ընտրության տարբերակները,- շարունակում է հեղինակը՝ նկատելով, որ դրանից, սակայն, ամեն ինչ խառնվում է: «Մեր հարաբերությունների լայն և նոր սահմանման կամ վերասահմանման համար մեզ պետք է, որ հայկական կողմը լիարժեք պատկերացնի, թե ինչ կարող է անել Մաքսային միության անդամակցությամբ ստեղծվող նոր իրավիճակներում»,- իր հերթին ասել է ԵՄ ընդլայնման հարցերով կոմիսար Շտեֆան Ֆյուլեի մամուլի քարտուղարը:
Հայաստանն ինքը կցանկանար իմանալ այդ դետալները, այն դեպքում, երբ դեռևս նոր ծրագրվող Եվրասիական միության միջուկ հանդիսացող Մաքսային միության անդամ չէ, այդ դաշինքի հետ համագործակցության պայմանները պարզ չեն և վիճարկվում են Մաքսային միության ներկայիս անդամների` Ռուսաստանի, Ղազախստանի և Բելառուսի միջև:
« Հայաստանը նաև որոշ մտավախություններ ունի,- գրում է Լոմսաձեն,- Առաջինը Լեռնային Ղարաբաղի խնդիրն է և Հայաստանի արևմտամետ շրջանակներում այս հարցում ևս բացասական են գնահատում ԵՄ հետ հարաբերությունների սառեցումը»:
Կարդացեք նաև
Սակայն Մոսկվան չի ցանկանում լքված լինել, համենայն դեպս, ևս մեկ անգամ: Կրեմլին չի հանգստացնում անգամ այն, որ ԵՄ կողմից որևէ ճնշում չի գործադրվում Հայաստանի նկատմամբ, որպեսզի վերջինս հրապարակի ԵՏՄ-ի հետ հարաբերությունների մանրամասները:
Այնինչ սեպտեմբերի 23-ին, երբ մի ամսից էլ քիչ ժամանակ էր մնացել մինչև հոկտեմբերի տասը` Հայաստանի Մաքսային միություն մտնելու օրը, Երևանը Մոսկվայից նախազգուշացում է ստացել` հեռու մնալ Եվրոպայից. ՀՀ-ում ՌԴ նախկին դեսպան Վյաչեսլավ Կովալենկոն, որն անցյալ տարի Հայաստանին ցուցումներ էր տալիս ընդդեմ ԵՄ հետ ցանկացած կապերի, այժմ հայտարարել է, որ եթե Հայաստանը պարտադիր և վերջնական պրոռուսական ընտրություն չկատարի և ենթադրյալ «եվրոպական արժեքներից» չհրաժարվի, ուկրաինական ոճի ճգնաժամի կբախվի:
Այս մասին է հիշեցնում վերլուծաբանը` կրկին հիշելով դիվանագետի ակնարկները և վերահաստատելով Հայաստանի` երկու կրակի թե միության միջև գտնվելու հանգամանքը:
Պատրաստեց Սյունե Սևադան
