ՀՀ քաղաքացիական ծառայության խորհրդի նախագահ Մանվել Բադալյանն ընդունեց Համաշխարհային Բանկի ավագ տնտեսագետ Դոնիտո դե Ռոսային` քննարկելու «Զարգացման քաղաքականության գործառնության» (ԶՔԳ) ծրագրից բխող` քաղաքացիական ծառայության համակարգում իրականացվող բարեփոխումների ընթացքը և այդ շրջանակում ՀԲ-ի հետ հետագա համագործակցության ուղղությունները:
Մանվել Բադալյանը բարձր գնահատեց քաղաքացիական ծառայության ոլորտում իրականացվող բարեփոխումներին ՀԲ-ի շարունակական աջակցությունը: Նա ընդգծեց «Զարգացման քաղաքականության գործառնության» ծրագրի շրջանակում քաղծառայության ոլորտում արդեն սկսված հիմնարար փոփոխությունների նշանակությունը: Մասնավորապես կարևորվեց քաղաքացիական ծառայության պաշտոնների միասնական կատալոգի ստեղծումը, որը հնարավորություն կտա բարելավել կադրերի ընտրության և գնահատման չափորոշիչները, կոնկրետացնել ծառայողներին առաջադրվող պահանջները: Իսկ քաղաքացիական ծառայության ոլորտում օրենսդրական վերջին փոփոխություններով քաղծառայողների ատեստավորումը փոխարինվեց նոր` գնահատման համակարգով, ըստ որի` առաջնայինը դառնում է ոչ թե քաղաքացիական ծառայողների` իրենց զբաղեցրած պաշտոններին համապատասխանության որոշումը, այլ նրանց մասնագիտական որակների կատարելագործման, նոր գիտելիքներ և անհատական կարիքներից բխող կոնկրետ կառավարչական հմտություններ ձեռք բերելու ձգտումների խթանումը:
Պարոն դե Ռոսան փոխանցեց ԶՔԳ ծրագրի շրջանակում բարեփոխումների նոր փուլ նախաձեռնելու հարցում Համաշխարհային բանկի պատրաստակամությունը: Համագործակցությունն ուղղվելու է արժանիքների վրա հիմնված` քաղաքացիական ծառայողների շահադրդման նոր, ավելի ճկուն և կատարելագործված մեխանիզմների մշակմանը` որպես քաղաքացիական ծառայության համակարգի կայունությունը, արդյունավետությունը և քաղաքացիներին մատուցվող ծառայությունների որակը բարձրացնելու հիմնական խթան:
Գ.ԱԲՐԱՀԱՄՅԱՆ
