«Կարծում եմ՝ գուցե մի քիչ էլ շուտ պիտի անեինք: Երկար ժամանակ գնդակը թուրքերի դաշտում էր, ընկերը չէր խաղում, և այդ խաղն անիմաստ էր դարձել»,-այսօր «Հայելի» ակումբում լրագրողների հետ հանդիպմանը անդրադառնալով ՄԱԿ-ի գլխավոր ասամբլեայում ՀՀ նախագահ Սերժ Սարգսյանի ելույթին, այսպիսի կարծիք հայտնեց քաղաքագետ Ալեքսանդր Մանասյանը: Նա ընդհանուր առմամբ դրական գնահատեց նախագահի ելույթը ու նրա վարած քաղաքականությունը՝ ասելով, թե «Այն, ինչ մենք արել ենք, ճիշտ ենք արել»:
Aravot.am-ի հարցին՝ շատերը կարծիք են հայտնում, թե ՄԱԿ-ի ամբիոնից ՀՀ նախագահն ըստ էության խոստովանեց, որ ձախողվել է իր նախաձեռնած «ֆուտբոլային դիվանագիտությունը», պարոն Մանասյանն արձագանքեց. «Կարծում եմ՝ դա այդպես չէ: Եթե ես լինեի նախագահ, նույնը պետք է անեի: Պետք է այդ քայլն անեինք, որ բացահայտեինք Թուրքիայի և Ադրբեջանի ագրեսիվ բնույթը: Մինչև դա չարվեր, դա մեր օգտին չէր աշխատի»:
Տաթև ՀԱՐՈՒԹՅՈՒՆՅԱՆ
