«Երբ Յանուկովիչը որոշեց, որ կոնտր-տեռորիստական օպերացիաներ պիտի անի ամբողջ Ուկրաինայի տարածքով մեկ, երկրում իրավիճակը վերահսկողությունից դուրս եկավ»,- այսօր ԱԺ պետաիրավական հարցերի հանձնաժողովի նիստում օրինակ բերեց ՀԱԿ պատգամավոր Գագիկ Ջհանգիրյանը`«Արտակարգ դրության իրավական ռեժիմի մասին» Հայաստանի Հանրապետության օրենքում փոփոխություններ կատարելու մասին» ՀԱԿ խմբակցության պատգամավորների ներկայացրած նախագծի ներկայացման ժամանակ: «Սկզբում Ուկրաինայի դեմ սկսեցին պայքարել կամավորները, հետո այդ կամավորները շեվրոներ հանեցին, եկան ուրիշ կամավորներ, հետո եկան զինված կազմավորումներ` Ուկրաինայի մի մասը միանգամից տարան, մյուս երկու մասերը տանում են»,- շարունակեց պատգամավորը`հավելելով, որ զինված ուժերի կիրառումը շատ վտանգավոր է:
Պետաիրավական հարցերի հանձնաժողովի նախագահ, ՀՀԿ-ական պատգամավոր Հովհաննես Սահակյանը միջամտեց Գագիկ Ջհանգիրյանին. «Դրա համար էլ ասում եմ`կիրառենք, որ մի մասը չտանեն»:
«Քաղաքական խնդիրները պետք է լուծել քաղաքական միջոցներով, ես հենց էդ եմ ասում Սահակյան»,- հակադարձեց Գագիկ Ջհանգիրյանը` նկատելով, որ 2008 թվականի մարտի մեկից հետո մեր օրենսդրական զարգացումը գնացել է հետեւյալ ուղով. «Ինչ ապօրինություններ գործել ենք մարտի մեկի նախօրյակին եւ հետո, հետագա բոլոր օրենքներով փորձել ենք դրանց օրինական տեսք տալ: Նախագահի մասին օրենքում փոփոխություններ ենք կատարել, որպեսզի հիմնավորենք, որ այո, կարող էինք նախագահի թեւերը բռնել ու հարկադրել նրան`տեղափոխել դուռ, հավաքների մասին նոր օրենք ենք ընդունել, որտեղ գրել ենք, որ կարող ենք ցրել էսինչ խաղաղ հավաքը` էսինչ դեպքերում, Քրեական օրենսգրքի հոդվածներ ենք փոխել`իբր թե անորոշ են, որպեսզի դատախազության մոգոնած օրենքները հիմնավորենք, ընդունել ենք արտակարգ դրության իրավական ռեժիմի մասին օրենք, որպեսզի մարտի մեկի Քոչարյանի ապօրինի հրամանագիրն օրինականացնենք ու հիմա էլ`ատամներով պաշտպանում ենք: Կարող եմ էլի թվարկել»:
Քննարկման ժամանակ բավական անհարմար դրության մեջ հայտնվեց ՀՀԿ-ական պատգամավոր Լեւոն Մարտիրոսյանն, որը փորձում էր ստանալ հարցի պատասխանը`արդյոք գործող Սահմանադրության մեջ սպառի՞չ չեն զինված ուժերի գործարկման դեպքերը: Գագիկ Ջհանգիրյանը երկար փորձում էր պատգամավորին բացատրել, թե ի՞նչ են զինված ուժերը եւ ի՞նչ դեպքերում, ի՞նչ կերպ կարող են օգտագործվել: Ի վերջո, Ջհանգիրյանի նյարդերը տեղի տվեցին: «Ցավոք դուք մեր պաշտպանության մասին օրենքին ծանոթ չեք, երեւի չեք էլ ծառայել»,- ասաց նա`հավելելով որ պատգամավորը փորձում է փոխել քննարկման առարկան:
Կարդացեք նաև
Իրավիճակը փրկեց Հովհաննես Սահակյանը`ընդհատելով բանավեճը`ասաց, որ Մարտիրոսյանի բարձրացրած հարցը կարգավորվում է արտակարգ դրության ռեժիմի մասին օրենքով: «Ապրես: Ուրեմն, իմ լեկցիան իզուր էր»,- հեգնեց Գագիկ Ջհանգիրյանը:
Նելլի ԳՐԻԳՈՐՅԱՆ
