Ջրօգտագործման միավորումների աշխատանքից դժգոհող «Ագրարագյուղացիական միավորման» նախագահ Հրաչ Բերբերյանը հարցին, թե վերջերս ՀՀ նախագահը պարգեւատրեց ՋՕ-երի աշխատակիցներին, կարծիք հայտնեց, որ նախագահը սխալ վրիպել է այդ կառույցին պարգեւներ հանձնելով: Նրա համոզմամբ, հենց ՋՕ-երի մեղքով է, որ գյուղացին այսօր զրկված է ոռոգման ջրից: Նրա խոսքերով այդ ջրերն ուղղվում են ՀԷԿ-երի ու ձկնաբուծարանների բիզնեսին` գյուղացուն թողնելով անջրդի:
Այսօր «Հենարան» ակումբում, գյուղացիների պաշտպանն առաջարկեց ՋՕ-երի ֆինանսավորումը դադարեցնել եւ այդ կառույցը դարձնել ինքնաֆինանսավորվող:
Մասնագետը գտնում է, որ խոշոր ֆերմերը, կոոպերացիան կարող է ինքնուրույն պայմանագրեր կնքել ջրառի հետ եւ իր հարցերն ինքնուրույն լուծել: Սակայն քանի դեռ գյուղացիների ոռոգումը ջրօգտագործող միավորումից է կախված, գյուղացին անջուր է մնալու, քանի որ այլընտրանք չունի, որպեսզի այլ ջրամատակարարի հետ աշխատի:
«Համայնքը մեզ համար ավելի թանկ է, քան որեւէ գործարանի ձկնաբուծարան»,-ասում է Հրաչ Բերբերյանը:
Կարդացեք նաև
Պարոն Բերբերյանի կանխատեսմամբ, կարտոֆիլը կթանկանա` մեծածախ գինը հասնելով մինչեւ 300 դրամի: Ըստ նրա, այն պնդումները, թե այս տարի կարտոֆիլի բարձր բերք ունենք, այնքան էլ այդպես չէ. անցյալ տարվա համեմատությամբ բերքն ավելի քիչ է եւ բացի այդ ողջ աշխարհում կարտոֆիլի բերքն այս տարի լավ չէ.
«Կարտոֆիլի արտահանումը կպահպանենք, բայց չի ավելանա, Վրաստանում էլ չկա Ռուսաստանում էլ կարտոֆիլի բերքը վատ է»:
Կարտոֆիլ այս տարի արտահանել ենք մոտ 5 հազար տոննա:
Հրաչ Բերբերյանի խոսքերով, ամեն տարի խոսում ենք նաեւ ցորենի «ռեկորդային բերքի», մասին, սակայն անցյալ փաստերը վկայում են, որ նախորդ տարվա համեմատ` 12 հազար տոննա ավելի ցորեն ենք ներկրել:
Միավորման նախագահի տվյալներով այս տարվա վեց ամիսներին
Հայաստանից մոտ 1000 գլուխ խոշոր եղջերավոր անասուն է արտահանվել, իննը ամսում, Հրաչ Բերբերյանը կարծում է, որ 3000 կանցնի: Այն դեպքում, երբ մեր երկիրը տավարի մսի պահանջարկը դժվարությամբ է բավարարում:
Անցյալ տարի ոչխարի միս ավելի պակաս ենք արտահանել, ինչի հետեւանքով մեր երկրում ոչխարի միսն էժանացել էր:
Լուսինե ԲՈՒԴԱՂՅԱՆ
