«1988-ի շարժումը սկսվեց այստեղից՝ Աբովյանից, երբ աբովյանցիները երթով մինչեւ Երեւան եկան, դա բում էր, պատմական էր: Հիշեք այսօրը: Նոր շարժման սկիզբը սկսում ենք Աբովյանից: Մեր պատիվն է, լուրջ պատասխանատվություն կա մեզ վրա քանակով , դուխով ու ոգով այս պայքարը սկսելու»,- այսօր Աբովյան քաղաքում ՀԱԿ-ի, ԲՀԿ-ի եւ «Ժառանգության» կազմակերպած հանրահավաքի ժամանակ ասաց ՀԱԿ փոխնախագահ Արամ Մանուկյանը:
Նրա խոսքով, միացել են երեք քաղաքական ուժեր, որոնք ունեն տարբեր մոտեցումներ, բայց համամիտ են Հայաստանը փրկելու հարցի շուրջ. «Սկսվել է Հայաստանում մի նոր շարժում, երբեք նմանատիպը չի եղել: Սա նոր շարժում չէ, նոր որակ է: Որեւէ երկրի կողմից չի ուղղորդվում, հավաքվել ենք Հայաստանի ճակատագրով մտահոգվածներս»:
Պարոն Մանուկյանի խոսքով, չպետք է դանդաղել այս գործընթացում, որովհետեւ դանդաղելը ձեռնտու է իշխանություններին ու արյունաքամ է անելու Հայաստանը. «Երկրի վիճակը շատ լուրջ է: Հայաստանը կորցնում է մարդկային ռեսուրսը, Հայաստանը սպառվում է: Չկա որեւէ հայ, որը չզգա փոփոխության անհրաժեշտությունը ու չդժգոհի»:
Նրա խոսքով, իշխանություններին հաջողվել է քաղաքացիների մի շերտ ձեւավորել, որոնք միայն հեռուստացույցով են համաձայնում երկրում փոփոխությունների անհրաժեշտության հետ, ասում են՝ շառից փորձանքից հեռու, բա որ մասնակցենք հավաքներին հացս, երեխես. «Մյուս մասն ավելի վախկոտ են, լքում են Հայաստանը: Բա որ թողնենք բոլորս գնանք, ո՞ւմ ենք թողնում էս երկիրը՝ բորենիների՞ն, ավազակների՞ն: Բա հետո՞»:
Կարդացեք նաև
Վերջում էլ կոչ արեց հավատալ իրենց.«Հավատացեք, մենք կուժեղանանք դրանից: Սա ճակատագրական, պատմական պահ է. կամ այս իշխանությունները իր մի քանի հոգով, իր բիզնեսով գող ու անկուշտ ախորժակով սպառում է երկիրը կամ մեր արժանապատվությունը հաղթում է: Կա կլանի ու արժանապատվության խնդիր, հաղթելու է հայի հավաքական կամքը»:
Արփինե ՍԻՄՈՆՅԱՆ
