Այսօր վաղ առավոտից ՀՀ կառավարության շենքի դիմաց Երևանի խոշոր տոնավաճառների աշխատակիցները գործադուլ էին հայտարարել: Նրանց էին միացել նաև զոհված զինծառայողների ծնողները: «Մենք շատ ենք, իրենք՝ քիչ, մենք պիտի իրենց կողքին լինենք»,- ասաց ցուցարար կանանցից մեկը: Ծնողների պատասխանն էլ չուշացավ. «Մենք քիչ ենք, բայց մեզնից շան պես վախենում են»:
Ցուցարարները պահանջում էին վարչապետ Հովիկ Աբրահամյանից դեմ առ դեմ քննարկելու շրջանառության հարկի մասին նոր օրենքը:
«Մենք միայն ցանկանում ենք հարկային ու մաքսային օրենքների փաստաթղթային շրջանառության պարզեցում: Ժողովուրդը տեղյակ չէ օրենքներից»,- ասաց «Ֆիրդուսի» տոնավաճառի աշխատակցուհին:
Մինչ կրքերը թեժանում էին, մի կին ընդդիմադիր կուսակցություններից մեկի թռուցիկներն էր բաժանում: Զայրացած ցուցարարները, թռուցիկները պատռելով, ասացին, որ իրենց պահանջն ուրիշ է. իրենք քաղաքականության հետ գործ չունեն: «Պրովոկատորնե՛ր, մի՛ շեղեք մեզ», -գոչում էին նրանք:
Կարդացեք նաև
Տեղեկացնենք, որ ՀՀ կառավարության որոշմամբ՝ այս տարվա հոկտեմբերի 1-ից առևտրի ոլորտում գործունեություն իրականացնող տնտեսվարող սուբյեկտների համար շրջանառության հարկի դրույքաչափը 3,5%-ից նվազելու է մինչև 1%: «Մենք համաձայն ենք 1% հարկ տալ ու աշխատելու, բայց ոչ նման ստուգումների պայմաններում», -հավելեցին ցուցարարները:
Անի Անտոնյան
+
