«Ֆեյսբուք» սոցիալական ցանցում նոր էջ է բացվել Սյունիքի նախկին մարզպետ Սուրիկ Խաչատրյանի՝ կրկին մարզպետ նշանակվելու դեմ: Էջի հեղինակներն այն անվանել են «Ո՛չ Լիսկային»՝ տեղադրելով այնտեղ տարբեր տեսանյութեր, որոնցում պատմվում է Սուրիկ Խաչատրյանի կատարած հանցագործությունների մասին:
Հակախաչատրյանական էջին արդեն միացել են հարյուրավոր քաղաքացիներ՝ կարծես ապացույց այն բանի, որ օրերս սոցիոլոգ Ահարոն Ադիբեկյանը հրապարակել էր նախկին մարզպետի բարձր վարկանիշը ցույց տվող հարցման արդյունքները, որն անցկացրել էր իր կենտրոնը, եւ որի դիմաց ստացել մեկ միլիոն հինգ հարյուր հազար դրամ գումար: Ֆեյսբուքյան այս էջը արագ է հավանության արժանանում, ընդամենը մեկ օրվա ընթացքում բացված էջին like-երով միացել է մոտ 1000 հոգի:
«Ես դեմ եմ «լիսկայությանը» իմ Հայաստանում։ Ես դեմ եմ Սյունիքի մարզպետի պաշտոնում Լիսկայի նշանակվելուն» վերնագրով էջում տեղադրված է նաեւ հայտնի այն տեսանյութը, որը արտացոլում է, թե ինչպես Սուրիկ Խաչատրյանի տան մոտ 2013թ. հունիսի 1-ին սպանվեց 43-ամյա Ավետիք Բուդաղյանը։ Հիշեցնենք նաեւ, որ Ավետիք Բուդաղյանի եղբայրը՝ Արտակ Բուդաղյանը, օրերս բաց նամակով իր զայրույթն էր հայտնել Ահարոն Ադիբեկյանի հայտնի սոցհարցման արդյունքների դեմ ու պահանջել հրապարակել գոնե 60 հոգու անուն, ովքեր «կողմ» են արտահայտվել Սուրիկ Խաչատրյանի վերադարձին: Թե ով է այս էջի հեղինակը՝ առայժմ հայտնի չէ, բայց փաստն այն է, որ ոչ միայն 60, այլեւ 1000 հոգի մեկ օրվա ընթացքում դեմ է արտահայտվել նախկին մարզպետին, որոնց թվում են բազմաթիվ սյունեցիներ: Ու ինչպես «Առավոտի» հետ զրույցում Ահարոն Ադիբեկյանն էր պնդում, թե չի կարող հրապարակել անուններ, քանի որ հարցումն արված է անանուն, այստեղ բոլորը, նաեւ սոցիոլոգը կարող են տեսնել դեմ արտահայտվածների անունները: Ակնհայտ է նաեւ մի բան, որ էջը հատուկ PR-ի կարիք չունի, այնտեղ մարդիկ չեն վախենում, եւ որ ամենակարեւորն է՝ այն գուցեեւ իրականությունն է արտահայտում:
ԵՎԱ ՀԱԿՈԲՅԱՆ
Կարդացեք նաև
«Առավոտ» օրաթերթ
24.09.2014
