Ըստ նրա՝ 23 տարվա վակուումը պետք է լրացնել Ռուսաստանով:
«Հայաստանում Ռուսաստանի ազդեցությունը պակասում է, ինչքան էլ պարադոքսալ դա չհնչի»,- այսօր՝ սեպտեմբերի 24-ին, «Նովոստի» միջազգային մամուլի կենտրոնում Մոսկվա-Թբիլիսի-Երեւան տեսակամրջի ընթացքում հայտարարեց լրագրող, կովկասագետ Ելենա Բադյակինան:
Նա օրինակ բերեց այն հանգամանքը, որ Օպերայի եւ բալետի թատրոնում համերգների ծրագրերն արդեն ռուսաց լեզվով հասանելի չեն. «Օպերայի եւ բալետի թատրոնի ծրագիրը միշտ ռուսերեն եւ հայերեն էր, վերջերս բացահայտեցի, որ այժմ այն հայերեն եւ անգլերեն է: Այսինքն՝ Հայաստանը արեւմտյան կողմնորոշում է ստանում: Դա, իհարկե՛, արհեստական երեւույթ է»:
Նա հավելեց, որ Ռուսաստանի դեսպանատներում համապատասխան կենտրոններ չկան, որպեսզի երկրով հետաքրքրվող երիտասարդներին տրամադրեն իրենց հետաքրքրող տեղեկատվությունը. «Ռուսաստանը մեծ սխալ գործեց, երբ դուրս եկավ մշակութային տարածքից եւ արդեն ընթանում է տնտեսական տարածքից Ռուսաստանի դուրս գալու գործընթացը: Բայց մշակութայինն ամենաակներեւն է»:
Կարդացեք նաև
Տիկին Բադյակինան վստահ է, որ թե՛ Վրաստանում, թե՛ Հայաստանում չի մարել հետաքրքրությունը դեպի Ռուսաստանի մշակույթը եւ պետությունների ընդհանուր պատմությունը, սակայն այդ մասին դպրոցներում չեն սովորեցնում. «Դասագրքերում ոչ մի դրական բան չի ասվում Ռուսաստանի մասին: Ես դա համարում եմ մեր մեծ սխալը եւ փորձանքը: Ուկրաինայում շատ պարզ երեւաց, որ Ռուսաստանը 23 տարի թողել է Ուկրաինային, եւ Ամերիկան այդ վակուումը լրացրել է: Այդ պատճառով՝ այդ վակուումը պետք է լրացնել Ռուսաստանով եւ ոչ մի դեպքում չթողել, որ գաղափարախոսությունը թեքվի դեպի Արեւմուտք»:
Ամի ՉԻՉԱԿՅԱՆ
Լուսանկարը՝ տիկնոջ Ֆեյսբուքյան էջից:
Այդ վակումը պետք է լրացնել համաշխարհային մշակույթով…