Իշխանությունը ժողովրդին վերադարձնելու նպատակով նոր նախաձեռնություն է ստեղծվել̀ «Ժողովրդական հասարակական նախաձեռնություն»: Այսօր այս խմբի անդամները «Նոյան տապան» ակումբում ասուլիսի ժամանակ հայտարարեցին, որ վաղը Թեքեյան կենտրոնում հիմնադիր ժողով են հրավիրել:
Նախաձեռնության անդամներից Գրիգոր Բարսեղյանն ասաց, որ իրենց համախմբման հիմք են դարձել սահմանադրական փոփոխությունների քննարկումները. «Հայաստանի քաղաքացիներս պարտավոր ենք մեր դիրքորոշումն ասել ու քննարկել այս հարցը»:
Նախաձեռնության երիտասարդ անդամներից Մկրտիչ Գրիգորյանն էլ պատմեց, որ արդեն հանդիպումներ են ունեցել քաղաքական ուժերի անհատ ներկայացուցիչների հետ. «Մեր նպատակը անհատներին համախմբելն է, ոչ թե կուսակցություններին: Այսօր Հայաստանում անհատներին համախմբելու խնդիր կա»:
Ասաց, որ երկրորդ պլանում են թողել կուսակցական պատկանելությունը եւ համագործակցության համար լայն դաշտ ունեն: Նրա խոսքով, իրենք հավաքելու են անհատների կարծիքները սահմանադրական փոփոխությունների վերաբերյալ եւ ուղարկեն համապատասխան հանձնաժողովին. «Նախկին ու ներկայիս Սահմանադրությամբ ամրագրված է, որ իշխանությունը պատկանում է ժողովրդին… եկել է իշխանությունը ժողովրդին վերադարձնելու պահը, որ քաղաքացին կարողանա իրեն, պետությանը հուզող խնդիրների վերաբերյալ իր խոսքն ասի ու հասցնի տեղ: Այդ առումով կարեւոր է ունենալ ժողովրդից ընտրված իշխանություն, ու մենք այս հարցի լուծմանը գնալու ենք Սահմանադրությամբ»:
Կարդացեք նաև
Արփինե ՍԻՄՈՆՅԱՆ
