Կենտրոն եւ Նորք-Մարաշ վարչական շրջանների ընդհանուր իրավասության դատարանում «Բանդայի գործով» մեղադրանքը պաշտպանող Սասուն Խաչատրյանը հրապարակեց ամբաստանյալներ Արտուշ Հակոբյանի, Սամվել Դավթյանի, Դավիթ Գալստյանի դատավճիռները:
Պաշտպանական կողմը նախկինում դատված լինելու մասին վկայող դատավճիռների գրեթե ամբողջական հրապարակումը դիտեց հանրային կարծիքի վրա ազդելու ակնհայտ սադրիչ քայլ: Մինչդեռ, մեղադրողի կարծիքով, հրապարակումը պայմանավորված էր նույն ձեռագրերով կատարված ավազակային հարձակումների առանձին դրվագներով:
«Բանդայի » պարագլուխ համարվող Արտուշ Հակոբյանի դեպքում 3 դատավճիռների հրապարակումը վկայեց այլ բանի մասին, որ նա մեղադրվել է ավազակային հարձակման համար, հետո մեղադրանքը փոխվել է, նա համաներմամբ ազատ է արձակվել, եւ մեղադրանքը կապված է եղել կեղծ փաստաթղթերի ձեռք բերման միջոցով Հայաստանից այլ պետություն գնալու հետ:
Կարդացեք նաև
Ամբաստանյալ Արտուշ Հակոբյանի նախկին պաշտպանը, որ այս գործով այլ ամբաստանյալի է պաշտպանում՝ Ռաֆիկ Սաֆարյանն ասաց, որ միշտ էլ Արտուշ Հակոբյանը եղել է իրավապահ մարմինների թիրախը. «Այս հրապարակումներն ինչի համար են: Այլ կլիներ, եթե հիմնավորվեր, որ նա նույն ձեռագրով կատարել է հանցագործություններ»:
Ա. Հակոբյանի պաշտպան Հովիկ Արսենյանը նայելով դատախազ Սասուն Խաչատրյանին ասաց. «Սա սադրանք է», եւ երբ զգուշացվեց դատավոր Մեսրոպ Մակյանի կողմից, նա ասաց. «Հոմանիշն ասեք, սադրանքի:Լավ, թող ես լինեմ սադրողը:Որն է հոմանիշը, լավ «քո ցավը տանե՞մը»:
Հրապարակվեցին Դավիթ Գալստյանի դատավճիռներն էլ: Մեղադրողը ուշադրություն հրավիրեց այն հանգամանքի վրա, որ ամբաստանյալը նախկինում պտուտակահանի միջոցով բացել է պատուհանները, ապօրինի մտել բնակարաններ, եւ կատարել է գողություններ:
Ամբաստանյալ Սամվել Դավթյանի դատավճիռները հրապարակելու ժամանակ էլ պարզվեց, որ նա իր առաջին ավազակային հարձակումը կատարել է 1992-93թթ., զինված, 20 միլիոն դրամի համար, եւ հանգուցյալ Գուրգեն Հայրապետյանի հետ: Այն Գուրգեն Հայրապետյանի, որը 2011թ.վնասազերծման ժամանակ սպանվեց իրավապահների կողմից: Չնայած, պաշտոնական տվյալներով, նա գլորվել էր բարձր վայրից ցած:
Մեկ այլ դրվագով էլ ամբաստանյալը ապօրինի զրկել էր զոհին ազատությունից, եւ կատարել ավազակային հարձակում:
Հետագայում դատարաններից մեկը նրան ուղարկել էր բժշկական հարկադիր բուժման:
Նախորդ դատական նիստին Արտուշ Հակոբյանի պաշտպան Հովիկ Արսենյանը միջնորդել էր, որպեսզի դատարան բերվեն Գուրգեն Հայրապետյանի դատավճիռները:
Ծանոթանալով դրանց, Հ.Արսենյանը հանդես եկավ հայտարարությամբ՝ բացառվելով, որ այս գործի դատաքննության ժամանակ մահացած Արմեն Դալլաքյանը հանդիպած լիներ Գուրգեն Հայրապետյանին:
«Վիվասել» եւ «Արմենթել» կապի օպերատորներից ստացված տեղեկանքների համաձայն էլ, հանցագործության օրը, Արտուշ Հակոբյանը գտնվել է Գառնիում, ալեհավաքը զանգ է գրանցել ուշ ժամին, Մոսկովյան փողոցից: Տուժող Նապոլեոն Ազիզյանի տան գողության ժամանակ էլ, առավոտյան ժամը 5-ին, Արտուշի հեռախոսը չի զանգել:
Դատարանը բավարարեց Հովիկ Արսենյանի միջնորդությունը. դատարան կհրավիրվի փորձագետ Արտակ Մինասյանը, որին պետք է տրվեն հարցեր, կապված զենքերի վրա հայտնաբերված հետքերի՝ մատնահետքերի մասին:
Հնչեց, որ զենքերը «քցված» են եղել մի գիշեր ոստիկանության փորձագիտականում, իսկ հետքերն էլ վերցվել են առանց ընթերակաների մասնակցության:
Հաջորդ նիստը տեղի կունենա հոկտեմբերի 1-ին:
Ռուզան ՄԻՆԱՍՅԱՆ
