Գորիսի թիվ 2 նախադպրոցական ուսումնական հաստատությունը համալրվեց նոր գույքով. այդ թվում երկհարկանի տարբեր գույնի 125 մահճակալով, որը հնարավորություն տվեց երեխաներին քնեցնել առանձին-առանձին: Նախակրթարանի տնօրեն Ժասմենա Խաչատրյանը պատմում է. «Մի օր հոլանդացի բարերարները գալով նախակրթարան, նկատեցին ու զարմացան, որ երեխաները երկու-երկու են քնում մահճակալներն, այն էլ հիմա` 21-րդ դարում: Ու ասացին` այդպես չի կարելի, դա հակահիգենիկ է և անհարմար քնելու համար: Մենք ձեզ կօգնենք գույքի հարցում: Խոսքին հաջորդեց կոնկրետ գործը»:
Եվ «Կամրջակ» սոցիալ բարեգործական հասարակական կազմակերպությունը բեռնատարներով Երևանից Գորիս ուղարկեց մահճակալները, ինչպես նաև 40 հատ գրասենյակային աթոռներ: Առաջիկայում նրանք նախակրթարանի հասցեով կուղարկեն նաև սեղաններ, պահարաններ: Այդ ամբողջ գույքի արժեքը կազմում է 13 միլիոն դրամ:
«Կամրջակը» ոչ միայն հատկացրեց գույքը, այլև սեփական ձեռքերով նախակրթարանում հավաքեց մահճակալները: «Մենք արեցինք մահճակալների հավաքման գործը, որովհետև ուզում ենք, որ դրանք ամուր լինեն, երեխաներն անվտանգ քնեն: Իսկ երեխաների մանկությունը պետք է ուրախ անցնի, նրանք միշտ պետք է ժպիտով լինեն: Խոսքս վերաբերվում է ոչ միայն այս երեխաներին, այլև աշխարհի բոլոր մանուկներին»,-ասաց տիկին Մարիա Գորիսը:
Թիվ 2 նախակրթարան հաճախում է 260 երեխա:
Ալվարդ Մեսրոպյան
Գորիս
