Այսօր՝ սեպտեմբերի 24-ին «Նոյյան Տապան» լրատվական գործակալության մամուլի սրահում ամերիկահայ հրապարակախոս, «Կալիֆորնիա Կուրիեր» թերթի հրատարակիչ եւ խմբագիր Հարութ Սասունյանն անդրադարձավ ոչ միայն Հայաստան-Սփյուռք համաժողովին, այլեւ հայության առաջ ծառացած մարտահրավերներին:
Պարոն Սասունյանի ձեւակերպմամբ, միշտ էլ հաճելի է հայրենիքի մեջ լինել, օրինակ` այս անգամ 700 հայ է ժամանել Հայաստան: «Որ գալիս են իրենց ծախսերով, հյուրանոցներում, ռեստորաններում գումար են դնում, դա էլ է ներդրում հայրենիքի տնտեսության մեջ»,-կարծում է նա:
Ասուլիսում անդրադարձ եղավ Հայաստան-Սփյուռք համաժողովին հնչած իր ելույթին, որտեղ Հարութ Սասունյանն առաջարկել էր համասփյուռքյան կառույց ստեղծել: «Հայաստանում եւ Արցախում կան ղեկավարներ, ընտրված պատգամավորներ կամ վարչապետ, հավանենք կամ չհավանենք կան, Սփյուռքում այդպիսի միավոր չկա, կան հազարավոր կազմակերպություններ, 7-8 մլն-անոց հայ ժողովուրդ, որ քով- քովի չեն գալիս…Սփյուռքի 10 տոկոսը անդամ են կուսակցությունների, բարեսիրական միությունների, կարծում եմ, որ պետք է կազմակերպվենք եւ անջատ-անջատ միավորները բերենք մի հարկի տակ»,-ասում է «Կալիֆորնիա Կուրիերի» խմբագիրը: Կարծում է, որ «մեկ հայ՝ մեկ քվե» սկզբունքով կարելի է համասփյուռքյան ընտրություններ կազմակերպել, 18-ը լրացած հայերը ամեն համայնքում ձայների մեծամասնությամբ պատգամավոր կամ ներկայացուցիչ ընտրեն: Այդպես, ըստ Սասունյանի, առաջին անգամ մեր պատմության մեջ կունենաք կառույց, որտեղ ժողովուրդն է ընտրել իր ղեկավարներին: Ու այդ կառույցն էլ լիազորված կլինի հանդես գալ Սփյուռքի անունից, որոշումներ կայացնել, համագործակցել Հայաստանի եւ Արցախի ղեկավարների հետ՝ առանցքային հարցերի շուրջ՝ Արցախի, Ցեղասպանության, հայ-թուրքական հարաբերությունների եւ այլ:
Պարոն Սասունյանը կարեւորելով համասփյուռքյան կառույցի ստեղծումը մի տհաճ դրվագ հիշեց. տարիներ առաջ Հիլարի Քլինթոնը ցանկություն է հայտնել հանդիպել ամերիկահայության ներկայացուցիչների հետ, սակայն վեճ է ծագել, թե ով պետք է մեկնի Վաշինգտոն ու ներկայացնի ամերիկահայությանը: Արդյունքում, հանդիպումը չեղյալ հայտարարվեց:
Կարդացեք նաև
Նա նաեւ կարծիք հայտնեց, որ չէր ցանկանա որեւէ համահայկական մարմին վերահսկվի մյուս մարմնի կողմից՝ բոլոր հայերը պետք է իրար հետ համագործակցեն ի շահ ժողովրդի:
Տիգրան Սարգսյանի՝ ԱՄՆ-ում դեսպան նշանակվելու հարցի մասին էլ խոսեց: Հարութ Սասունյանը դեմ չէ, որ մեղավոր մարդիկ պատժվեն օրենքով, բայց, քանի դեռ չունի փաստեր՝ իր առջեւ դրված, չի կարող կարծիք հայտնել: Նրա խոսքով, նույն տրամաբանությամբ բոլորի մասին էլ կարելի է ասել՝ գող են, մեղավոր են, «բայց ՀՀ նախագահը իրեն ուղարկել է ԱՄՆ, Ամերիկյան կառավարությունն էլ ընդունել է»: Հարութ Սասունյանի ձեւակերպմամբ, պետք է կոնկրետ ապացույցներ լինեն Տիգրան Սարգսյանի դեմ, իսկ առայժմ մնում է ընդամենը հետեւել, թե նա ինչպես է աշխատում ԱՄՆ-ում:
Գոհար ՀԱԿՈԲՅԱՆ
