Սկսած ամենալավ սուպերմարկետների ցանցերից՝ վերջացրած սովորական խանութներով, ոչ մի տեղ չի նշվում հրուշակեղենի եւ աղցանների արտադրման եւ դրանց պիտանելիության ժամկետը: Անգամ ամենամեծ սուպերմարկետում վաճառողները չգիտեն, թե ով է դրանք արտադրում. այսօր «Անալիտիկ» կենտրոնում, անդրադառնալով սննդամթերքի անվտանգությանը, ասաց Սպառողների ազգային ասոցիացիայի նախագահ Մելիտա Հակոբյանը: Տիկին Հակոբյանը չցանկացավ անուն նշել, սակայն ասաց, որ միայն մի խոշոր հրուշակեղենի արտադրող կա երկրում, որը նշում է պիտանելիության ժամկետը եւ հետեւողական է իր արտադրանքի նկատմամբ. «Մնացած բոլոր արտադրողները դրանից զերծ են»:
Տիկին Հակոբյանն այսօրվա հանդիպման ընթացքում նաեւ անդրադարձավ այն հանգամանքին, որ խանութներում աղցանների պիտանելիության ժամկետը նույնպես գրված չէ. «Ավելին, այսօրվա աղցանը շատ հանգիստ կերպով խառնում են երեկվա աղցանին եւ վաճառում»:
Տիկին Հակոբյանը օրինակ բերեց, որ իրենց ուսումնասիրությունների արդյունքում նման դեպքեր գրանցվել են արդեն փակված «Սթար» սուպերմարկետների ցանցերում, երբ մշտապես ժամկետանց աղցաններ էին վաճառում. «Եթե այսօրվա աղցանը տեղափոխում են վաղվա, ապա դրանում բազմաթիվ մանրէներ են առաջանում, այդ թվում նաեւ բորբոսասնկեր, որոնք աղեստամոքսային հիվանդությունների պատճառ կարող են հանդիսանալ»:
Մելիտա Հակոբյանը տեղեկացրեց, որ պատրաստվում են խնդրի մասին բարձրաձայնել կառավարությունում:
Կարդացեք նաև
Սպառողների ազգային ակադեմիայի փոխնախագահ եւ մոնիթորինգի բաժնի ղեկավար Ռուբեն Հայթյանն էլ անդրադարձավ կիսաֆաբրիկատների անվտանգության խնդիրներին. «Դրանք նույնպես հստակ մակնշում չունեն: Պարկերով ներկրում են այլ երկրներից, փաթեթավորված չեն պատշաճ կերպով: Չկա՝ թե ով է արտադրում, որտեղ է արտադրված, կամ քանի ամիս է այն պիտանի օգտագործման համար»:
Էլյա ՀՈՎՀԱՆՆԻՍՅԱՆ
