Լույս է տեսել Լեւոն Մարգարյանի «Պիեսներ» գիրքը, որը յուրովի մտածողության, հայոց պատմության յուրօրինակ մեկնաբանության մատյան է։
Լեւոն Մարգարյան անունը լայնորեն հայտնի անուններից չէ, բայց նրա թատերգությունները ներկայացվել են տարբեր բեմերում, հնչել են ռադիոյով, գտել են իրենց ընթերցողին։ «Պիեսներում» զետեղված են «Դաշինք կրակի հետ», «Փշրվող մարտակառքեր», «Հայկ Նահապետ» թատերգությունները։
Գրքի նկարազարդումները յուրօրինակ բանալի են՝ հասկանալու հեղինակի մտահոգությունը, անհանգստությունը, զգոնության կոչը։
Նկարիչ Նիկօյին լիովին հաջողվել է ստեղծել այն տրամաբանությունը, որը հեղինակը հասցեագրել է իր երիտասարդ ընթերցողին։
Կարդացեք նաև
«Դաշինք կրակի հետ» պատմական դրաման մեզ տանում է Կիլիկյան թագավորության ժամանակները, երբ եվրոպական պետությունները խարդավանքներ էին հյուսում այս անառիկ բերդ- ամրոցը տապալելու։ Այդ կոպիտ, բիրտ ուժին Մարգարյանը հակադրում է Կիլիկիայի ուժը՝ գիտությունը, արվեստը, բանաստեղծությունը, հայրենապաշտությունը։ Գլխավոր հերոսներից մեկը՝ Օշինը, Զաբել թագուհուն հիշեցնում է, որ «արդեն բազում դարեր մեր ինքնության վահանը եղել է բարոյականությունը… գայթակղություններն են ժողովրդին ամբոխ դարձնում»։
«Փշրվող մարտակառքեր» դրաման քրիստոնեության ընդունումն է՝ Տրդատ Երրորդի կերպարի նորովի լուծմամբ։ Ագաթանգեղոսյան հայտնի պատմությունը՝ Տրդատի խոտաճարակ դառնալը, այստեղ նոր լուծում է ստանում. Տրդատը «խաղում» է, նա օգնում է Լուսավորչին՝ մարգարե ներկայանալու եւ թագավորին բուժելու հավատի զորությամբ։ Այստեղ Տրդատը ներկայացվում է որպես հմուտ քաղաքագետ։
Իսկ «Հայկ Նահապետ» դրաման բաբելոնյան աշտարակաշինության եւ Հայկի խռովության կապն է հաստատում։ Հայկը չի ցանկանում մասնակցել աշտարակի շինությանը եւ հեռանում է Բելից. նրան օգնում է քրմապետը, որը Հայկի եւ նրա սերունդների հետագա կյանքի ձեւակերպումն է տալիս. «դատապարտված եք այն ինքնությանը, որը վրեժխնդրության զգացում չունի, եւ եթե յուրաքանչյուր ոք իր հայրենիքը համարի աշխարհի սիրտը, աշխարհը շատ ավելի պայծառ կդառնա»։
Սահմանին կանգնած զինվորին, ավագ դպրոցի պատանուն, ուսանողներին է հասցեագրված այս գիրքը, որը դաշինք է կնքում արդարության, խաղաղության, սիրո, ուժի եւ հայրենասիրության հետ։
Ցանկալի է, որ գիրքը գտնի իր հասցեատիրոջը եւ ընթերցվի դպրոցներում ու զորամասերում։
ՍՈՒՍԱՆՆԱ ԱԲԱԶՅԱՆ
Երեւանի Վ. Բրյուսովի անվան
ԼՀՀ-ի հայագիտության ամբիոնի
ավագ դասախոս
«Առավոտ» օրաթերթ
23.09.2014
Դժվար: