«Բացարձակ չեմ վստահում այդ հարցումներին: Ըստ իրենց` Հայաստանի ժողովրդի խելքն, այսպես ասած, գնում է իշխանությունների համար, այնքան շատ են սիրում Սերժ Սարգսյանին, որ գլխապատառ, այդ սիրուց վառված՝ թողնում-փախչում է այս երկրից: Եվ Սերժ Սարգսյանին էլ 2013-ին այլ բան չէր մնում, քան գիշերը ընտրությունները կեղծել և մի քանի հարյուր հազար ձայն ավել նկարելով՝ ևս մեկ անգամ դե ֆակտո նախագահ դառնալ»,-Aravot.am-ի հետ զրույցում «Ժառանգություն» կուսակցության փոխնախագահ Արմեն Մարտիրոսյանն այսպիսի կարծիք հայտնեց` մեր խնդրանքով անդրադառնալով օգոստոսի 8-17-ը «GALLUP International association»-ի հայաստանյան ներկայացուցչության կողմից 1067 անձի շրջանում իրականացված հարցման արդյունքներին:
Հիշեցնենք, որ ըստ այդ հարցման արդյունքների` հայ հասարակության 31 տոկոսը կարծում է, որ «քառյակն արհեստական է, և մոտակա ժամանակ կփլուզվի» և 51 տոկոսի կարծիքով` «քառյակի պայքարն անարդյունավետ է. արդյունքում ոչինչ չի փոխվի»:
Մեր դիտարկմանը, թե այս արդյունքները հրապարակվել էին մինչև ՀՅԴ-ի` քառյակից դուրս գալը, ուստի հետազոտության մեջ իրականության հետ համապատասխանող արդյունքներ կան, պարոն Մարտիրոսյանն արձագանքեց. «Իսկ իրենք հարցում արե՞լ են, թե ժողովուրդը ինչ է ցանկանում: Եվ ի՞նչ է, ժողովուրդը ցանկանում է, որ ՀՀԿ-ն ` Սերժ Սարգսյանի գլխավորությամբ մնա իշխանությա՞ն»:
Արմեն Մարտիրոսյան
Արմեն Մարտիրոսյանը հարցականի տակ է դնում, թե այս հարցումն իրականացվել է «Գելափի» կողմից ու նշում. «Առավել ևս սա «Գելափ» չէ, այդ բրենդն ինչ-որ ձևով օգտագործվել է, իսկական «Գելափը» վաղուց հայտարարություն է տարածել, որ այս Գելափներն իրենց հետ վաղուց կապ չունեն»:
Նույն հարցի կապակցությամբ ԲՀԿ խմբակցության պատգամավոր Միքայել Մելքումյանն ասաց. «Ոչ կարդացել եմ, ոչ գիտեմ դրա մասին»: Քառյակի փլուզման փաստի մասին ԲՀԿ-ական պատգամավորը պարզաբանեց. «Փլուզման հարց չկա, մեկ հարցի` Սահմանադրական բարեփոխումների շուրջ կարծիքները տարբեր են եղել, բայց հետո համագործակցությունը շարունակվելու է: Նորմալ է, որ ինչ-որ հարցի շուրջ քաղաքական ուժերը տարաձայնություններ ունենան»:
Կարդացեք նաև
Հարցումներին վստահելու հարցի կապակցությամբ պարոն Մելքումյանը փոխանցեց. «Ես վստահում եմ նրան, որ երկրում փոփոխություններ են պետք: Եթե երկրում կա արտագաղթ, սոցիալական խնդիրներ, վիճակը փրկել է պետք, իսկ ով ասում է, որ փոփոխություններ են պետք, նրանց պետք է վստահել: Իսկ եթե այլ ուժեր են ուզում փոփոխություններ անել, թող գան անեն, բայց դրանք ոնց որ թե չեն երևում»:
Դեռ մի հակամարտությունը չհաղթահարած, ոչ իշխանական ուժերը կրկին տարաձայնություններ ունեն: Լուրեր են շրջանառվում, թե եռյակում իշխանափոխության պահանջ ներկայացնելու հետ կապված տարաձայնություններ կան: Արմեն Մարտիրոսյանից հետաքրքրվեցինք` հոկտեմբերի 10-ի հանրահավաքում իշխանափոխության կոչեր հնչելո՞ւ են, և արդյոք տարաձայնություններ ունե՞ն այս առումով ԲՀԿ-ի հետ: Պարոն Մարտիրոսյանը պատասխանեց. «Քննարկումներն ընթանում են հանգիստ մթնոլորտում: Հասարակությունն իր մոտեցումներն ունի և կասի, թե ինչ է ցանկանում. իսկ ես կարծում եմ, որ դա իշխանափոխությունն է: Կարևորն անելն է, ոչ թե դրա մասին բարձրաձայնելը: Մարդիկ կան, որ իշխանափոխության մասին են բարձրաձայնում, բայց բաց ամեն կերպ անում են, որ իշխանությունները մնան»:
Հանրահավաքին իշխանափոխության պահանջի մեր հարցին ի պատասխան՝ պարոն Մարտիրոսյանն ասաց. «Կհետևեք հանրահավաքին և կտեսնեք` այդ հարցը կբարձրացվի՞, թե` ոչ»:
Միքայել Մելքումյան
Միքայել Մելքումյանն էլ արձագանքեց. «Ի՞նչ է նշանակում իշխանափոխություն. այսինքն` արտահերթ ընտրություննե՞ր, ԱԺ և նախագահի արտահերթ ընտրություննե՞ր: Ես ասում եմ, որ նման կոչեր առանձին մարդիկ միշտ էլ կարող են անել, բայց երբ միասնական են հանդես գալիս, արդեն հանդես են գալիս օրակարգային որոշումներով»:
Մեր հստակեցմանը, եթե ժառանգականները որոշեն, որ հոկտեմբերի 10-ին իշխանափոխության կոչերով են հանդես գալու, որը կլինի ԲՀԿ արձագանքը, պարոն Մելքումյանն արձագանքեց. «Նման խնդիր չկա, ինչ-որ օրակարգով միասնական կատարվում է, ուրեմն միասնական օրակարգով է լինում: Առանձին մարդիկ կարող են իրենց կարծիքները հայտնել, բայց մի բան է սեփական կարծիք հայտնելը, այլ բան է օրակարգային հարց բարձրացնելը»:
Տաթև ՀԱՐՈՒԹՅՈՒՆՅԱՆ
