Այսօր «Փաստարկ» ակումբում ՀՀԿ խմբակցության պատգամավոր Խոսրով Հարությունյանը պատասխանեց ընդդիմության կողմից բարձրացված այն հարցին, որ սահմանադրական փոփոխություններ անելու գերնպատակը վերարտադրությունն է: Խոսրով Հարությունյանի խոսքերով՝ «Կա՞ մի քաղաքական ուժ, որը չի ձգտում իշխանության, ուզում է լինի ընդդիմադիր: Հետեւաբար ինչո՞ւ պետք է քաղաքական մեծամասնությունը չձգտի իշխանության կամ իշխանությունը պահելուն:
Դա անտրամաբանական է: Երբ առաջ են բերում քաղաքական մենաշնորհ արտահայտությունը, Ֆինլանդիայում սոցիալ-դեմոկրատները 36 տարի շարունակ եղել են իշխանության եւ որեւիցե մեկի մտքով չի անցել համարել դա քաղաքական մենիշխանություն: Իշխանության վերարտադրության թեզը եւ այսօրվա համակարգում, եւ խորհրդարանականում հավասարարժեք հնարավոր է: Հիմա անհամեմատ ավելի հեշտ իրականանալի է»:
Aravot.am-ը հետաքրքրվեց՝ ի՞նչ կարծիք ունեք «Ժառանգություն» խմբակցության ղեկավար Ռուբեն Հակոբյանի ներկայացրած 3 պայմանների մասին, դրանք ինչքանո՞վ են ընդունելի:
Հիշեցնենք, որ Ռուբեն Հակոբյանն առաջարկում է Ընտրական օրենսգրքում փոփոխություններ կատարել, ընդդիմությանը վերահսկողական լուրջ լծակներ տալ եւ 2016-ի գարնանն արդեն բարեփոխված Սահմանադրությամբ համապետական ընտրություններ անցկացնել:
Կարդացեք նաև
Խոսրով Հարությունյանը պատասխանեց. «Այդ առաջարկությունները, ըստ էության, հնարավորություն են Սահմանադրական բարեփոխումների իրենց առաջարկած թեզից խուսափելու համար: «Ժառանգությանը» շատ դժվար է ասել, որ գիտեք, ես 2012-ին համար մեկ խնդիրը համարում էի սահմանադրական բարեփոխումները, հիմա չեմ ուզում: Չեն ուզում, որովհետեւ դա իրենք չեն նախաձեռնել:
Հիմա էլ առաջ են քաշել հարցեր, որոնք սահմանադրական բարեփոխումների հետ որեւէ առնչություն չունեն: Ընդդիմությանը վերահսկողական լծակներ տալն անհամեմատ ավելի անշրջելի եւ կայուն կլիներ, եթե ամրագրվեր Սահմանադրությամբ, այլ ոչ թե օրենքներով, որը հետո ով գա իշխանության՝ կարող է փոխել: Այնպես որ, պարոն Հակոբյանը կամ «Ժառանգությունը» պետք է այս մասին էլ մտածի»:
Հռիփսիմե ՋԵԲԵՋՅԱՆ
