Տասնվեց ժամ ինքնաթիռում և տեսողական էֆեկտների վետերան Ռոջեր Կուպելյանը «Թումո» ստեղծարար կենտրոնում է՝ երկժամյա հանդիպմամբ: Նա կինոսիրողներին հայտնի է «Մատանիների տիրակալը» , Քլինթ Իսթվուդի «Մեր հայրերի դրոշները» ֆիլմերում կատարած աշխատանքներով, սակայն այսօրվա այցի նպատակն իր ընթացիկ աշխատանքը ներկայացնելն է: «Բյուզանդիայի արևելքը. պատերազմի աստվածները և պատերազմող սրբերը» փաստագրական մինի-սերիալների շարքի ստեղծման մասին ոգևորված խոսելուց առաջ մասնագետը «Ցմահ մոլուցք» անունը կրող սլայդ-պատմության օգնությամբ հյուրերին ներկայացնում է իր կյանքը, որի շարունակությունը նորաստեղծ ֆիլմն է:
Ռոջեր Կուպելյանը ծնվել ու կյանքի առաջին տասներկու տարիներն ապրել է Աֆրիկայի արևմուտքում ու հեքիաթների փոխարեն լսել է Վարդան Մամիկոնյանի մասին պատմությունները: Հենց սա էլ պատճառ է դարձել Ավարայրի ճակատամարտի մասին փաստագրական մինի-սերիալներ նկարահանելու համար. «Հայրս փոքր տարիքում սովորեցրեց ինձ «Հայ եմ ես, հայ եմ ես, քաջ Վարդանի թոռն եմ ես» հայտնի տողերը: Աֆրիկայում հայկական մշակույթի հետ առնչվելու միակ ճանապարհը հայոց պատմությունն ու հերոսներին իմանալն էր: Մենք անգամ չգիտեինք, որ Վարդանը նման տեսք ուներ, բայց նա այն հերոսն է, որի մասին լսելով մենք մեծացել ենք: Աշխարհում, որտեղ պետք է գտնես քո փրկությունը, կարևոր է գտնել հերոսների, որոնք քեզ ուժ կտան: Վարդան Մամիկոնյանը մեծ դեր ունի իմ կյանքում»:
Ռոջեր Կուպելյանը նկարների ու քարտեզների օգնությամբ ցույց տվեց դեպի Բյուզանդիա ստեղծագործական իր ողջ ճանապարհը, դերասանների հագուստը, անիմացիոն լուծումները, կիսվեց գաղափարներով ու նույնիսկ ֆիլմից փոքրիկ հատված ցուցադրեց: Նա նաև նշեց, որ ֆիլմի սաունդթրեքի հեղինակը Սերժ Թանկյանն է:
Կուպելյանը նշեց, որ ֆիլմի հիմնական շեշտադրումը Վարդան Մամիկոնյանի կերպարի վրա է, սակայն ֆիլմում զուգահեռ խոսվում է նաև հունական, հռոմեական, բյուզանդական պատմության մասին, այդ իսկ պատճառով ֆիլմը արտասահմանցիներին նույնպես կհետաքրքրի: «Մեզ՝ հայերիս պետք է «օտար մթնոլորտում» լավ համագործակել ու իրար ձեռք բռնել այնպես, ինչպես հրեաներն են անում: Ամեն տարի երեք-չորս ֆիլմ են պատրաստում իրենց ցեղասպանության մասին: Մեկը ստացվում է լավ, մյուսն ավելի լավ և այդպես շարունակ: Իսկ մենք ցանկանում ենք միանգամից շատ լավ ֆիլմեր նկարահանել, այդպես հնարավոր չէ: Եվ առհասարակ,միայն մեր ցեղասպանության վրա կենտրոնանալը սխալ է, մենք հիանալի պատմական անցքեր ունենք՝ ֆիլմ նկարահանելու համար»:
Կարդացեք նաև
Ֆիլմի հիման վրա տպագրվել է կոմիքսային պատմությունների գիրք, որը շուտով նաև Հայաստանում կլինի, իսկ ֆիլմը կբարձրանա մեծ էկրաններ հաջորդ տարվա ապրիլին:
Լուսանկարը «Թումոյի»
Սյունե Սևադա
