ՊՆ քննչականի պետի տեղակալ Պերճ Այվազյանը պնդում է, որ ՊՆ քննչական ծառայություն հասած գործերը չեն կոծկվում:
Aravot.am-ի հետ զրույցում նա հերքեց, թե Սյունիքի նախկին մարզպետ Սուրիկ Խաչատրյանի որդու` Տիգրան Խաչատրյանի` թմրամիջոցների ազդեցության տակ լինելու հանգամանքը հենց ՊՆ քննչականում է հերքվել:
Հիշեցնենք, որ թեեւ փորձաքննության եզրակացությամբ հաստատվեց, որ Բուդաղյանների վրա կրակելու օրը Տիգրան Խաչատրյանը եղել է թմրամիջոցի ազդեցության տակ, այդ հանգամանքը, ինչպես մեզ հետ զրույցում ասաց Բուդաղյանների փաստաբան Հայկ Ալումյանը, հենց ՊՆ քննչական մարմնում անտեսվեց. «Այս հարցին ուղղակի չանդրադարձան»:
«Եթե նախաքննությամբ հերքվել է, որ թմրամիջոցի ազդեցության տակ է եղել, ոչինչ չեմ կարող ասել…եկեք այդ հարցին չանդրադառնանք»,- ասաց ՊՆ քննչականի պետի տեղակալը:
Կարդացեք նաև
Բուդաղյանների փաստաբան Հայկ Ալումյանն էլ հիշեցրեց, որ Տիգրան Խաչատրյանի ձերբակալությունից հետո նրանից վերցված նմուշներով հաստատվել էր նրա օրգանիզմում թմրամիջոցի առկայությունը. «Այլ բան է, որ բառախաղ են անում` ասելով, թե չի հաստատվել դեպքի ժամանա՞կ է նա ընդունած եղել թմրամիջոց, թե՞` դեպքից առաջ: Անմիջականորեն դեպքի ժամանակ գտնվե՞լ է ազդեցության տակ, թե՞ մինչեւ այդ կամ հետո է ընդունած եղել ու դեպքի ժամանակ ազդեցությունը չի եղել:
Մի գործ, որտեղ կոծկվում են ծանրացուցիչ հանգամանքներում կատարված դիտավորյալ սպանությունը, հրազենային մարմնական ծանր վնասվածքները կոծկվում են, կոծկվում է Սուրիկ Խաչատրյանի մեքենայում տեղի ունեցած ծեծը, ամեն ինչ էլ կկոծկեն»:
Հիշեցնենք, որ Քանաքեռ եւ Զեյթուն վարչական շրջանների ընդհանուր իրավասության դատարանը որոշել է անցած տարի Սուրիկ Խաչատրյանի` Գորիսի առանձնատան դիմաց տեղի ունեցած դեպքերով նրա որդուն` Տիգրան Խաչատրյանին եւ թիկնապահ Զարզանդին դատական նիստի մասնակից դարձնել` հրավիրել դատարան բացատրություններ տալու:
Պարոն Ալումյանի խոսքով, Խաչատրյանի եւ Զարզանդի` դատարան գալը նախատեսված է
սեպտեմբերի 27-ին: Բայց պարոն Ալումյանը չբացառեց, որ նրանք չեն ներկայանա կամ կուղարկեն իրենց փաստաբաններին:
Արփինե ՍԻՄՈՆՅԱՆ
