Այսօր «Եռաբլուր» հուշահամալիրում ազատամարտիկները հանդիսավոր արարողությամբ տոնեցին Հատուկ Գնդի կազմավորման 24-րդ տարեդարձը։
Ազատամարտիկները հարգանքի տուրք մատուցեցին՝ զոհված ազատամարտիկների գերեզմաններին ծաղկեպսակ դնելով։ Հատուկ Գնդի հուշաքարի մոտ լռությամբ հարգեցին զոհվածների հիշատակը։
«Քանի որ 24 տարի առաջ, երբ Սովետական միությունը դեռ չէր փլուզվել, մենք բանակ ունենալու իրավունք չունեինք, այդ պատճառով ստեղծվեց Հատուկ գունդը, որին տարբեր ջոկատներ միացան, եւ մենք ինքներս սկսեցինք պաշտպանել մեր երկիրը»,- այսպես ներկայացրեց մեզ հետ զրույցում գնդի ստեղծման պատմությունը Ազատամարտիկների դաշինքի նախաձեռնող խմբի անդամ, հրապարակախոս, լրագրող Սուրեն Սարգսյանը։
«Արաբո» ջոկատի հրամանատար Մանվել Եղիազարյանը մեզ հետ զրույցում գնդի 24-րդ տարեդարձի մասին խոսելիս, ասաց, որ այսօր ինքն իրեն շատ վստահ է զգում եւ պատասխանատվության բարձր զգացումով է լցված. «Անկախ ամեն ինչից, որքան էլ աղավաղեն Արցախյան պատմությունը, որքան էլ սուտ խոսեն, միեւնույն է, մենք հիմնադրել ենք երկիր, մենք պետություն ենք հիմադրել։ Բոլորը փախած էին, թաքնված էին, իսկ կային մարդիկ, որ տանկերի տակ են մտել եւ հաղթել են պատերազմը։ Մենք ազատագրել ենք 12 հազար ք/կմ տարածք, այդ փաստը եղել է։ Այս պատճառով մենք պարտավոր ենք մեր ազգային ազատագրական ոգին ամենաբարձր սանդղակի վրա պահել»։
Կարդացեք նաև
Էլյա ՀՈՎՀԱՆՆԻՍՅԱՆ
