«Այսօրվա դրությամբ ունենք 2004 նախագծահաշվարկային փաստաթուղթ, որ այս-այս աշխատանքները պիտի անենք, որպեսզի գործարանն աշխատի, թե` նոր տեխնիկայի ներդրումով, որքա՞ն ներդրում պետք կլինի, ի՞նչ միջոցների հաշվին, եւ այլն»,-այսօր, էներգետիկայի եւ բնական պաշարների նախարարությունում «Նաիրիտի» վերաբերյալ քննարկումից հետո Aravot.am-ի հետ զրույցում ասաց գործարանի նոր, ժամանակավոր տնօրեն Ռուբեն Սաղաթելյանը:
Պարոն Սաղաթելյանի ներկայացմամբ` ամերիկյան աուդիտորական ընկերությունն էլ, որ եկել էր ծանոթացել ծրագրի, դրական պատասխան էր տվել .«Ասել են, որ մեր ծրագրով կարելի աշխատացնել գործարանը: Այս ծրագրով գործարանը կարող է աշխատել եւ բութադիենային, եւ ացետիլենային եղանակով»: Տնօրենի վստահեցմամբ` օտարերկրյա աուդիտորական ընկերությունն իր տեսակետը ներկայացնելիս, շեշտել է, որ գործարանը միջազգային չափանիշներին համապատասխան գործարան դարձնելու համար մոտ 300 միլիոն դոլար է անհրաժեշտ:
«Իսկ մենք ասում ենք` գործարանի վերագործարկումը 1 տարում հնարավոր չէ, ասում ենք, եկեք 300 միլիոնի փոխարեն, 70 միլիոնի ներդրում անենք ու գործարանը վերագործարկենք մի մասը, հետո, մյուս տարի էլ ասենք` 30 միլիոնի, ու կամաց-կամաց 4-5 տարի հետո սարքենք միջազգային ստանդարտներին համապատասխան: Տեսեք`Չինաստանի գործարանում 900 աշխատող է, որովհետեւ ամեն ինչ ավտոմատացված է, մեզ մոտ` մեկը կառավարման վահանակի մոտ է, 10 հոգի արտադրամասում: Այսինքն` այդ մակարդակի հասցնելու համար շատ ժամանակ է պետք»:
Պարոն Սաղաթելյանն ասաց, իրենց ծրագիրը դեռ պետք է նորից քննարկվի, որպեսզի հաստատվի:
Նելլի ԲԱԲԱՅԱՆ
