«Մենք պատմական առիթ ունենք երկիրը ճիշտ ուղու վրա դնելու. նրանք, ովքեր դեմ են, դեմ են Հայաստանի զարգացմանը: Անձնական ամբիցիաների պատճառով երկրի առաջընթացին դեմ են»,- «Հայաստան-Սփյուռք» հինգերորդ համաժողովի ընթացքում լրագրողների հետ զրույցում անդրադառնալով ՀՅԴ-ի՝ քառյակը լքելու որոշմանը և սահմանադրական բարեփոխումներին՝ այսպիսի կարծիք հայտնեց ՀՅԴ Բյուրոյի ներկայացուցիչ Հրանտ Մարգարյանը:
Նա հավաստիացրեց, որ որոշումը կայացվել է քառյակում՝ համաձայնեցմամբ ու պարզաբանեց. «Այն խոսակցությունները, որ հնչում են, թե դրանից դուրս է եղել որոշումը, էթիկայի նորմերի խախտում է»:
Պարոն Մարգարյանը վստահեցրեց, թե «որևէ մեկը չի կարող այս երկրում ստեղծել անձնական իշխանություն, քանի որ համակարգային փոփոխությունները բերելու են իրական ժողովրդավարության, և կոլեգիալ՝ ԱԺ-ի մակարդակով են հարցերը քննարկվելու ու լուծում ստանալու, դա երկրի առաջընթացի հիմնական գրավականն է»: Դիտարկմանը, թե Սահմանադրական բարեփոխումները Սերժ Սարգսյանի վերարտադրման համար են կատարվում, պարոն Մարգարյանն արձագանքեց. «Ախր ծիծաղելի է: Այս իշխանությունները վերարտադրվել են գործող Սահմանադրությամբ, ուստի Սահմանադրությունը ինչպե՞ս կարելի է ասել, որ փոխում են, որ վերարտադրվեն, ինչի՞ մասին է խոսքը»:
Դիտարկմանը, թե մյուս երեք ուժերը պատճառաբանում են, թե հիմա սահմանադրական բարեփոխումների ժամանակ չէր, այսօր ավելի հրատապ խնդիրներ կան, պարոն Մարգարյանն արձագանքեց. «Այսօրվա խնդիրները, որ կան, համակարգային փոփոխության կարիք ունեն: Իրենք էլ էին մի քանի տարի առաջ համաձայն, այսօր ի՞նչ է պատահել: Պատահել է այն, որ որոշները կարծում են, որ կարող են անձի իշխանություն ստեղծել, բայց երկիրը, կարծում եմ, այլևս չի կարող շալկել այդ տեսակետը»: Հարցին՝ ո՞ւմ նկատի ունեք, պարոն Մարգարյանն արձագանքեց. «Իրենցից հարցրեք»: Հստակեցմանը, նկատի ունի ԲՀԿ-ի՞ն, պարոն Մարգարյանն արձագանքեց. «Մի ծիծաղեցրու»:
Կարդացեք նաև
Տաթև ՀԱՐՈՒԹՅՈՒՆՅԱՆ
ԱԺ-ի մակարդակով հարցերը քննարկվելու ու լուծումներ ստանալու համար պետք է, ժողովրդական լեզվով ասած, խելքը գլխին ԱԺ ունենալ։ Եթե դաշնակցությունը կարողանա Սահմանադրական բարեփոխումների փաթեթում մտցնել համամասնական ընտրական եղանակով ԱԺ-ի ձևավորման դրույթը, ապա ինչ որ չափով կարելի է հավատալ դաշնակցության անկեղծությանը: