«Հայաստանյան իրադարձությունները հասկանալու համար, ես վաղուց հետեւում եմ ուկրաինական զարգացումներին, AFK սիստեմայում զարգացումներին: Հայաստանում ներքաղաքական ոչինչ չկա եւ, ցավոք, ներսից շատ քիչ բան է կախված»,- այսօր «Անալիտիկ» վերլուծական կենտրոնում հայտարարեց քաղաքական տեխնոլոգ Կարեն Քոչարյանը:
Լրագրողներից մեկի զարմացած դիտարկմանը`բայց ամսի տասին հանրահավաք է, քաղտեխնոլոգը հակադարձեց. «Ես համաձայն եմ այն դիտարկումների հետ, որ սա կլինի հերթական հանրահավաքը»: Բանախոսը տարակուսեց, որ անհասկանալի են քաղաքական ուժերի հետագա քայլերը, այդ թվում նաեւ իշխող կուսակցության. «Գագիկ Ծառուկյանից ես չեմ լսել, որ պահանջում է իշխանափոխություն: Լեւոն Տեր-Պետրոսյանը պահանջում է, բայց պարզ չէ, թե ինչ պիտի անի, եթե ԲՀԿ-ն չպահանջի: Ամոթ է, նախագահը կանչում է ՀՀԿ ֆրակցիային, որ ասի`գնացեք գործի»:
Հարցին`կարո՞ղ է եռյակի հանրահավաքը վերաճել այնպիսի դժգոհության ալիքի, որ արտահերթ ընտրությունների հանգեցնի, Կարեն Քոչարյանն ասաց, որ ինքը չի տեսնում ոչ մի արտահերթ ընտրությունների առիթ, համապատասխան հասարակական տրամադրություններ չկան: «Ենթադրենք, ամսի 10-ին 20 հազար մարդ բերեցին, բայց հասարակությունը փոփոխության պահանջ չի դնում`ոչ կրթության որակի, ոչ կյանքի որակի: Հասարակությունը դեգրադացվել է այն աստիճան, որ սպասում է, թե երբ պիտի գան ընտրությունները, որ իրենց հինգ հազարը ստանան: Երեխան ասում է`լավ սովորեմ, որ գնամ»,- ասաց բանախոսը`հավելելով, որ բոլորն ամենքից ամեն ինչ պահանջում են, բացի իրենցից:
Բայց իշխանափոխությունը ե՞լք է այս իրավիճակից`հարցին էլ պատասխանեց. «Իշխանափոխությունն ինչ-որ մի ձեւ է փոփոխության, այն կարող է լինել լավ, կարող է լինել`վատ: Բայց եթե իշխանափոխությունը լինի պալատական հեղաշրջման տեսքով, դա ոչինչ էլ չի տա, բացառությամբ որոշ մարդկանց անձնական ամբիցիաների բավարարումից»:
Կարդացեք նաև
Լրագրողներից մեկն էլ հիշեցնելով, որ հոկտեմբերի տասին նախատեսվում է, որ Հայաստանը կստորագրի Եվրասիական տնտեսական միությանն անդամակցության փաստաթղթերը`հետաքրքրվեց`եռյակի համատեղ հանրահավաքը կարո՞ղ է կանխարգելիչ դեր կատարել: «Երեքից երկուսուկեսն ուզում են, ի՞նչը պիտի կանխարգելի: «Ժառանգությունում» հիմա էդ կռիվն է գնում`մի մասն ուզում է, մյուսը`ոչ»,- ասաց բանախոսը`հիշեցնելով, որ ոչ ՀԱԿ-ը, ոչ էլ ԲՀԿ-ն դեմ չեն Հայաստանի`ԵՏՄ-ին անդամակցությանը:
Նելլի ԳՐԻԳՈՐՅԱՆ
