«Հայաստանում չկան սահմանափակումներ համացանցում: Հայաստանը անցյալ տարի ճանաչվել է ինտերնետի ազատ գոտի՝ զբաղեցնելով 29-րդ տեղը: Առանց տեղեկատվության փոխանակման, հնարավոր չէ կառուցել քաղաքացիական հասարակություն: Իրանը, Չինաստանը թույլ չեն տալիս տեղեկատվության ազատություն համացանցում»,- այսօր Քաղաքացիական հասարակության օրն է եւ այդ առիթով «Տեսակետ» ակումբում հրավիրած ասուլիսում քաղաքացիական հասարակության ակտիվության հետ կապված այսպիսի կարծիք հայտնեց «Ինտերնետ հանրություն» ՀԿ փոխնախագահ Գրիգոր Սաղյանը:
«Ընդդեմ իրավական կամայականությունների» ՀԿ նախագահ Լարիսա Ալավերդյանի դիտարկմամբ՝ խոսքի ազատությունը համարվում է կարեւոր բաղադրիչ՝ քաղաքացիական հասարակության կայացման. «Ճիշտ է, կարող է լինել խոսքի ազատություն, բայց այդպես էլ չկայանա քաղաքացիական հասարակությունը: Մեզ մոտ հրաշալի զարգանում են ԶԼՄ-ների իրավունքները պաշտպանող քաղաքացիական հասարակության խմբերը: Այն օրենքները, որ պիտի ընդունվեն, նրանք լավ ազդեցություն են ունենում:
Տիկին Ալավերդյանը նշեց, որ քաղաքացիական հասարակությունը հազվադեպ է կայանում իշխանությունների կամքով, դա լինում է ի հեճուկս իշխանությունների:
Aravot.am-ը հետաքրքրվեց՝ Դուք ասում եք, որ դա լինում է ի հեճուկս իշխանությունների, բայց Սերժ Սարգսյանի կողմնակիցները, որպես այս իշխանության ձեռքբերում՝ նշում են քաղաքացիական հասարակության ակտիվացումը, այն, ինչը չի եղել երկրորդ նախագահ Ռոբերտ Քոչարյանի ժամանակ: Քաղաքացիական հասարակության կայացման համար նախագահի բռնակալ լինելը ազդեցություն չունի՞:
Կարդացեք նաև
Նա պատասխանեց. «Այն , որ ուժային մեթոդների կողմնակից երկրորդ նախագահը իրեն դրսեւորեց որպես այդպիսին 2004-ին եւ 2008-ին՝ դա փաստ է: Այն , որ գործող նախագահը զերծ է այդ կոշտ ու կոպիտ քայլերից՝ ես դա ասել եմ 2008-ին: Եթե հարցը մնար Սերժ Սարգսյանին՝ նա չէր կիրառի բիրտ ուժ: Դա անձերի հոգեկերտվածքի հետ է կապված: Իսկ թե ինչու հասարակությունը ակտիվացել՝ ավտորիտարիզմի ազդեցությունն է»:
Հարցին՝ ոստիկանապետ Վլադիմիր Գասպարյանն ասում է, որ թեժ աշնան կողմնակիցներին սառը ցնցուղ է սպասվում, քաղաքացիական հասարակությունը կարո՞ղ է այդպես զարգանալ՝ Լարիսա Ալավերդյանը պատասխանեց. «Ես չեմ ընդունում ոստիկանապետի այդպիսի գեղարվեստական արտահայտությունները: Վլադիմիր Գասպարյանի արտիստիզմն է պահանջել, որ եթե ասել են տաք, ինքն էլ ասի սառը»:
Անդրադառնալով նորից քաղաքացիական հասարակության զարգացմանն ու խոսքի ազատության խնդիրներին՝ տիկին Ալավերդյանն ասաց, որ հարեւան Ադրբեջանը կամաց-կամաց հետընթաց է ապրում եւ գալիս է քաղաքակրթական ավելի ցածր հարթության վրա է կանգնում. «Այն, որ ՄԱԿ-ի խոշտանգումների դեմ պայքարողներին չեն ընդունել պատշաճ, նրանք էլ, որպես բողոքի նշան, լքել են Ադրբեջանը, ինչքան ցածր մակարդակի մասին է խոսում: Մեզ համար կարեւոր է, որ մեր հարեւանը լինի ժողովրդավար: Երբ այդպիսին չի լինում, նա ավելի չարանում է, ագրեսիվանում է: Պետք է ցանկանաս, որ այսօրվա հակառակորդի պայմանները լավ լինեն, որ իր ագրեսիվությունը քչանա»:
Լարիսա Ալավերդյանը վստահեցրեց, որ հասարակությունը պիտի ինքը պայքարի, որ կայանա. «Ղարաբաղում խոսք կա, ասում են՝ Աստված անողին է պարտական, անքուն ջաղացի պես պետք է անես, երկնքից մանանա չի թափվում»:
Հռիփսիմե ՋԵԲԵՋՅԱՆ
