«Ուրախ եմ, որ պատեհ առիթ է ստեղծվել ձեզ հետ միասին արժևորել Հայաստան-Սփյուռք-Արցախ եռամիասնությունը; Այս եռամիասնության մեջ է մեր հաջողության միակ գրավականը»,-այսօր «Հայաստան-Սփյուռք» հինգերորդ համաժողովի բացման արարողությանը Ալ. Սպենդիարյանի անվան օպերայի և բալետի ազգային ակադեմիական թատրոնում հայտարարեց ՀՀ վարչապետ Հովիկ Աբրահամյանը:
Նա դահլիճ մուտք գործեց ոչ թե կենտրոնական մուտքով, այլ կուլիսներից, իսկ ՀՀ սփյուռքի նախարար Հրանուշ Հակոբյանը նրան ներկայացրեց որպես «մեծահարգ» վարչապետ ու վարչապետի ականջին շշնջում էր հանդիսավոր արարողության հերթականությունը:
Համաժողովի բացման արարողությանը ներկա էին Մեծի Տանն Կիլիկիո Կաթողիկոս Ն.Ս. Օ.Տ.Տ Արամ Ա-ն, Ն.Ս.Օ.Տ.Տ. Գարեգին Բ-ն, Ռուսաստանի հայերի միության նախագահ Արա Աբրահամյանը, ՀՅԴ բյուրոյի ներկայացուցիչ Հրանտ Մարգարյանը, ՌԱԿ, ՍԴՀԿ ատենապետերը, Հրայր Հովնանյանը, ԼՂՀ նախագահ Բակո Սահակյանը և այլք:
Վարչապետը մեջբերեց նաև Նժդեհին ու դիմելով սփյուռքահայերին՝ նշեց. «Մենք ՀՀ-ում մեզ ավելի զորեղ ենք զգում՝ թիկունքում ունենալով Սփյուռքի ներուժը: Վստահ եմ, որ դուք էլ ընկալում եք Հայաստանը որպես ձեր անկախ հայրենիք: Մեր շահերը փոխկապակցված են, իսկ մեր գործողությունները համաձայնեցված պիտի լինեն»:
Կարդացեք նաև
Վարչապետը դիմեց սփյուռքահայ գործարարներին. «Ձեր գործնական առաջարկները աչքաթող չեն արվի: Վաղուց հասունացել է բարեգործությունից դեպի փոխշահավետ գործունեությանն անցնելու ժամանակը»:
Այնուհետև քննադատեց Ադրբեջանի վարած ռազմատենչ քաղաքականությունը:
Այս հարցին իր ելույթում անդրադարձավ նաև ԼՂՀ նախագահ Բակո Սահակյանը. «Մեր եռամիասնությունն ունի կարևոր աշխարհաքաղաքական դերակատարություն: Գիտեմ, որ բոլորդ հատուկ ուշադրությամբ հետևում էիք ղարաբաղա-ադրբեջանական սահմանին տեղի ունեցած միջադեպերին. Ադրբեջանի կողմից զինադադարի խախտումները հրադադարի հաստատումից հետո հակառակորդի կողմից իրավիճակի ապակայունացմանն ուղղված ամենակոպիտ ծավալուն գործողություն են»:
Ն.Ս.Օ.Տ.Տ. Գարեգին Բ-ն իր օրհնության խոսքում նշեց. «Վերջին ժամանակներս հրադադարի խախտման բազում դեպքերը, սահմանային բնակչության տևական գնդակահարությունները ցույց տվեցին, թե որքան փխրուն է մեր երկրի խաղաղությունը: Մեր հարևանի սպառնացող վտանգը կրկին շեշտում է մեր համախմբվածության անհրաժեշտությունը»:
Մեծի Տանն Կիլիկիո Կաթողիկոս Ն.Ս. Օ.Տ.Տ. Արամ Ա-ն իր օրհնության խոսքում շեշտեց. «Ղարաբաղի անվտանգությունը վերջինն ամիսներին սկսել է դառնալ մտահոգիչ: Ղարաբաղի անվտանգությունը ՀՀ անվտանգությունն է և փոխադարձաբար: Չենք կարող ձեոնապահ մնալ Ղարաբաղի ներքին հզորությունն ավելի ամրացնելու հրամայականի դիմաց»:
Արամ Ա-ի ելույթի ընթացքում դահլիճը պարբերաբար ծափահարում ու ոգևորվում էր, քանի որ Կաթողիկոսն անդրադառնում էր Հայոց ցեղասպանության ճանաչման, հատուցման, Հայաստանի ու Սփյուռքի միասնականության մասին:
Տաթև ՀԱՐՈՒԹՅՈՒՆՅԱՆ
