«Վովա Գասպարյանն ավելի շատ խոսում էր` որպես մարդ, քան որպես ոստիկանապետ»,-Aravot.am-ի հարցին` թեժ աշունը սառը ցնցուղով ավելի թեժացնելու մասին` ՀՀ ոստիկանապետի հայտարարությունը ընդունել որպես սպառնալի՞ք, թե՞ ոստիկանապետի լիազորությունների գերազանցում, այսպես պատասխանեց ՀՀՇ վարչության անդամ Հովհաննես Իգիթյանը:
Նա նշեց, թե իր համար նույնքան դժվար է խոսել Վովա Գասպարյանի մասին, որքան դժվար է հենց ոստիկանապետին տալ հարցազրույցներ: Այդ հանգամանքը նա պայմանավորեց Վլադիմիր Գասպարյանի` արցախյան ազատամարտի ակունքներում կանգնած լինելու փաստով. «Ինքը եղել է արցախյան պայքարի ակունքներում և շատ հաճախ իրեն ավելի շատ քաղաքական գործիչ, քան ոստիկանապետ, կամ գործադիրի ներկայացուցիչ է զգում: Սխալ է, որ իրեն թույլ է տալիս անել այն հայտարարությունները, որոնք պետք է անի քաղաքական գործիչը: Ոստիկանապետը պիտի անի մեկ հայտարարություն` մենք կոչված ենք նրա համար, որ ՀՀ-ում ցանկացած մարդ ու կուսակցություն լինի օրենքի շրջանակներում, ընդ որում, այդ օրենքի շրջանակները շատ հաճախ ինքը չպիտի որոշի, այլ հրահանգ տրվի ավելի դրան ուղղված մարմինների կողմից. դատարան, դատախազություն»:
Պարոն Իգիթյանի կարծիքով` նման հայտարարություն «կսազեր» Էդուարդ Շարմազանովին, կամ Գալուստ Սահակյանին. «Ի՞նչ է ինքն աշխատում ` սառը ցնցուղ, սանտեխնի՞կ կամ ինքը նկատի ունի, որ ջրցան մեքենանե՞րը կօգտագործի, կամ ի՞նքը պետք է որոշի` այդտեղ օրենքը խախտվե՞լ է, թե` ոչ: ՀՀ ոստիկանապետը նման հայտարարություն անելու իրավունք չունի: Եվ եթե մեր մեծամասնություն լինելու ժամանակ այսպիսի բան լիներ, ես այդ հարցը կբարձրացնեի խորհրդարանում»:
Տաթև ՀԱՐՈՒԹՅՈՒՆՅԱՆ
