«Քո կարծիքը ոչ մեկ չի հարցնում»,-այսօր կառավարության նիստին ՀՀ վարչապետ Հովիկ Աբրահամյանն այսպես արձագանքեց տրանսպորտի եւ կապի փոխնախարար Արթուր Առաքելյանին: Փոխնախարարը զեկուցում էր մի շարք օրենքներում փոփոխություններ կատարելու մասին նախագիծը, եւ երբ «Պետական տուրքի մասին» օրենքում լրացում կատարելու մասն էր ներկայացնում Արթուր Առաքելյանը, ի պատասխան վարչապետի հարցի, թե` ինչու է պետտուրք ներառվում, փոխնախարարն ասաց` «Իմ կարծիքով…», բայց վարչապետը թույլ չտվեց Առաքելյանը շարունակի, ընդհատեց ու ասաց, որ փոխնախարարի կարծիքն իրեն չի հետաքրքրում:
Ապա վարչապետը հետաքրքրվեց, թե ինչու են ընդհանրապես նման պետտուրք սահմանել, միջազգայի՞ն փորձն են հաշվի առել, ինչին ի պատասխան Արթուր Առաքելյանն ասաց, որ Ռուսաստանում է գործում այս տեսակի պետտուրք. «Գաբարիտով բեռնատարների համար է»:
Ըստ այս նախագծի, նախատեսվում է «Չմասնատվող բեռ փոխադրող ծանրաքաշ տրանսպորտային միջոցին օրենքով սահմանված դեպքերում Հայաստանի Հանրապետության ընդհանուր օգտագործման ավտոմոբիլային ճանապարհներով մեկանգամյա փոխադրման իրականացման հատուկ թույլտվություն տալու համար բազային տուրքի տասնապատիկի չափով»:
Քննարկման ժամանակ էկոնոմիկայի նախարար Կարեն Ճշմարիտյանն ինչ-որ բան էր իր տեղից ուզում հասկացնել, վարչապետը Ճշմարիտյանին էլ կշտամբեց` «Քո փոխարեն ես եմ խոսում»:
Կարդացեք նաև
Նելլի ԲԱԲԱՅԱՆ
