Գերմանիայի Բոնն քաղաքում նախորդ տարվա հոկտեմբերին առաջին անգամ անցկացված «Առանց սահմանների» միջազգային փառատոնն այս տարի կանցկացվի Հայաստանում:
«Մշակույթների երկխոսություն» հիմնադրամը և Մայր աթոռ սուրբ Էջմիածնի թանգարանները սեպտեմբերի 22-28-ը փառատոնի շրջանակներում կներկայացնեն «Քրիստոնեություն. ժողովուրդ. քաղաքակրթություն» խորագիրը կրող գիտաժողովը, ինչպես նաև «Ժամանակ և տարածություն» խորագրով կերպարվեստի գործնական աշխատանքը (workshop):
Ինչպես այսօր լրագրողների հետ հանդիպման ժամանակ տեղեկացրեց «Մշակույթների երկխոսություն» հիմնադրամի նախագահ Սոնա Հարությունյանը, «Ժամանակ և տարածություն» խորագրով կերպարվեստի գործնական հանդիպում-աշխատանքին կմասնակցեն արվեստագետներ 5 երկրներից: Հայաստանից կմասնակցեն Համլետ Հովսեփյանը, Տիգրան Սահակյանը, Աշոտ Գրիգորյանը:
Սեպտեմբերի 23-25-ը նրանք կաշխատեն ՆՓԱԿ-ում: Իսկ նկարիչների հետ հանդիպումներն ու նրանց ստեղծագործությունների ցուցադրությունները կկայանան «Ականաթ» ցուցասրահում (սեպտեմբերի 23-ին) և «The Club» ակումբում (սեպտեմբերի 24-ին):
Սեպտեմբերի 26-ին ՆՓԱԿ-ում արդեն տեղի կունենա հայ և այլազգի արվեստագետների համատեղ ցուցահանդեսի հանդիսավոր բացումը:
Կարդացեք նաև
«Այդ արվեստագետներն առաջին անգամ են գալիս Հայաստան: Եվ մեզ համար շատ կարևոր է հայ արվեստագետների արվեստի հանրահռչակումը Հայաստանի սահմաններից դուրս ապրող և ստեղծագործող մարդկանց շրջանում: Դա գուցե հետագայում նաև համագործակցության հնարավորություն ընձեռի մեր արվեստագետներին: Եվ, բնականաբար, չի կարելի անտեսել նաև փառատոնի կարևորությունը փորձի փոխանակման տեսանկյունից»,- ասում է Ս. Հարությունյանը:
Հայ առաքելական եկեղեցու Մայր աթոռ սուրբ Էջմիածնի թանգարանների և արխիվի տնօրեն Տեր Ասողիկ քահանա Կարապետյանն էլ հատկապես կարևորում է փառատոնի շրջանակներում կայանալիք «Քրիստոնեություն. ժողովուրդ. քաղաքակրթություն» խորագրով գիտաժողովը:
Նա նույն փառատոնի շրջանակներում նախորդ տարի մասնակցել է ցուցահանդեսին զուգահեռ ընթացող «Մշակույթ. քաղաք. կրոն» խորագրով միջազգային գիտաժողովին և կարծում է, որ այն անփոխարինելի հարթակ է երկխոսության համար. «Նմանատիպ գիտաժողովները շատ կարևոր են հարաբերությունների առումով, նաև մշակութային նշանակություն ունեն: Ընդհանրապես մշակույթը չափազանց կարևոր տեղ ունի միջազգային երկխոսության հարցում. համերաշխության և խաղաղության հասնելու հրաշալի միջոց է: Մայր աթոռը պարբերաբար ներկայացնում է իր ժառանգությունը խոշոր թանգարաններում: Դա լավ առիթ է մեր մշակույթը ճանաչելի դարձնելու, ինչպես նաև հետաքրքրվողներին Հայաստան հրավիրելու առումով»,- ասում է քահանան:
Սիրանուշ ՀԱՅՐԱՊԵՏՅԱՆ
